Уһулуччулаах судаарыстыбаннай уонна политическай диэйэтэл Исидор Никифорович Барахов төрөөбүтэ 125 сылыгар анаан Үөһээ Бүлүүгэ Харбалаахха Сиэн Мунду «Исидор Барахов» кинигэтин тула ааҕааччылар түмүстүлэр. Кинигэни олус сэҥээрэн, астынан туран аахпыттарын кэпсээтилэр.
Педагогическай үлэ бэтэрээнэ Максим Иванович Шестаков кинигэ ааҕааччыга тиийимтиэ тылынан суруллубут, киһи хат ааҕар араас түгэннэрэ элбэҕин туһунан эттэ. Исидор Барахов оскуолаҕа үөрэммит буолан, Дмитрий Спиридонович Спиридонов туһунан сылаастык аҕынна. Харбалаах нэһилиэгин баһылыга Платонов Константин Данилович И. Бараховка аналлаах тэрээһиннэри билиһиннэрдэ. Дьоро киэһэҕэ Д. Иванов аатынан Ороһутааҕы народнай тыйаатыр (реж. Васильева С.К.) артыыстара В. Сивцев «Аатын ааттыаҕыҥ» диэн хоһоонун аахтылар. Мария Васильевна Няникова «Кини» диэн Иван Гоголев хоһоонун ааҕан истээччилэри олус долгутта.
Кинигэ киэҥ атыыга тахсан хас биирдиибитигэр тиксэрэ буоллар диэн ааҕааччылар баҕа санааларын этиннилэр. Ити курдук кинигэ билиһиннэриитэ ааста. Бу кинигэни аахтахха, устуоруйа биир дьикти лииһин арыйыаххыт, уһулуччулаах Киһи Исидор Барахов хорсун быһыытын билсиэххит.
Евдокия Семенова, И.Н. Барахов аатынан
СӨ судаарыстыбаннаһын музейын үлэһитэ.