Көмүс хостооччу сэдэх үлэтигэр Ороһуттан Алексей Самсонович Власьев үлэлээбитэ. Кини гидромонтировщик, ол эбэтэр көмүсчүт саамай хара үлэтин баһылаабыта. Уус-Майа улууһугар Ыныкчааҥҥа «Томь» учаастакка көмүс сууйбута.
«Көмүстээх» учаастакка, промприбор көрүдүөрүгэр, бульдозер тоҕо силэйбит боруодатын гидроважгердынан өрө тыктарарга, «СБШ-4» насоһунан хачайданан кэлэр уу түллүүтүн анал фиксаторынан хонтуруоллуурга эриллибитэ-мускуллубута. Аны көмүһү сууйар сезоҥҥа сууккаҕа уон икки чаас, бөдөҥ көһөҥө таастаах учаастакка үлэлиирэ олус илистиилээҕэ үһү. Барыта илии-быччыҥ үлэтэ эбит. Промприбор трагар таас хардаҕына, уон алта киппэлээх кубаалданан көйөн ыытарын туһунан ахтара. Этэ-хаана үөрэнэн бастыҥ үлэһит аатын ылбытын, киэн туттан туран ахтан ааһабыт.
«Тымтык» эдкорпост, Ороһу нэһ.