Г.Г. Софронов аатынан Өлөөкө-Күөл орто оскуолатыгар тохсунньу 16-21 күннэригэр Музыка уонна уруһуй нэдиэлэтэ ыытылынна. Онно кылаастарынан музыкаҕа аналлаах эркин хаһыаттарын таһаарыы куонкуруһа буолла. Биһиги, алтыс кылаастар, музыка эмтиирин туһунан ис хоһоонноох хаһыаты оҥорбуппут. Учууталбытын кытта үлэбитин үллэстэн бары кыттыбыппыт.
Мин музыка киһи мэйиитигэр дьайыытын көрдөрөр уруһуйу ойуулаабытым. Денис Винокуров ханнык музыкальнай инструмент киһи хайа уорганнарыгар дьайыытын уруһуйдаабыта. Игнат Винокуров музыка ханнык ыарыылартан эмтиирин ойуулаабыта. Мирик Винокуров ханнык музыка эмтиирин суруйбута. Бары туһааннаах үлэбитин оҥорон хаһыаппытын таһаарбыппыт уонна бу хаһыаппытынан бастаатыбыт.
Атын кылаастар хаһыаттарыгар музыкальнай инструменнар араастарын ойуулаабыттар, суруйбуттар. Сорохтор музыка туһунан бэргэн этиилэри суруйбуттар этэ.
Мин музыка эмтиир күүстээҕин, доруобуйаҕа туһалааҕын билэн олус соһуйдум. Оттон эһиги, оҕолоор, билэҕит дуо?
Арылхан Винокуров, 6 кылаас үөрэнээччитэ,
Орто Халыма, Өлөөкө-Күөл б.