Бүгүҥҥүттэн, тохсунньу 24 күнүттэн, Дьокуускай куоракка Саха сирин историятыгар аан бастакытын эр дьоҥҥо Россия Кубогын саахымакка күрэхтэһиитэ — Ил Дархан Кубога саҕаланна. Барыта 50 кыттааччы 9 күн устата саахымакка ким күүстээҕин, кыахтааҕын быһаарсыахтара, олор истэригэр — 5 аан дойдутааҕы кылаастаах гроссмейстер уонна 6 ФИДЕ маастара.
Бүтүн Россиятааҕы саахымат күрэхтэһиитигэр эр дьоҥҥо 1800 уонна кыргыттарга 1700 саахымакка үрдүк рейтиннээх баҕалаах дьон кыттыыны ылар. Дойдубут бастыҥ саахыматчыттара Москва, Санкт-Петербург куораттартан, Крымтан, Сахалинтан, Приморьеттан, Хабаровскайтан, Бурятияттан кэллилэр, кинилэр истэригэр оскуола үөрэнээччилэрэ эмиэ бааллар.
Россия саамай эдэр гроссмейстерын сааһа 16 эрэ. Кини аата Володар Мурзин, Москва уобалаһыгар Химки куоракка олорор, Е.М. Примаков аатынан гимназия үөрэнээччитэ. Кини 7 сааһыттан саахыматынан дьарыктанар, 10 сааһыгар Европа первенствотын кыайар. 13 сааһыгар Володар аан дойдутааҕы маастар уонна Россия спордун маастара буолар. Ол кэннэ аан дойдутааҕы гроссмейстер икки баллын толорор уонна рейтинин 2550 ахсааҥҥа улаатыннарар. Володар Саха сиригэр аан бастакытын кэлэн, дойдубут тымныытын сөҕөр.
Күрэхтэһии үөрүүлээх арыллыыта СӨ Национальнай художественнай мусуойун дьиэтигэр ыытылынна. Үөрүүлээх арыллыыга СӨ Бырабыыталыстыбатын бэрэссэдээтэлин солбуйааччыта Сергей Местников, «СӨ Cаахымат федерацията» общественнай тэриллии эрэгийиэннээҕи бэрэсидьиэнэ, «Үүнэр көлүөнэ целевой фонда» генеральнай дириэктэрэ Владимир Егоров, СӨ спортка уонна физическэй култуураҕа миниистирэ Леонид Спиридонов, күрэхтэһии кылаабынай судьуйута, ФИДЕ аан дойдутааҕы арбитра, бүтүн Россиятааҕы категориялаах спортивнай судьуйа Михаил Крюков кыттыыны ыллылар.
Салгыы киэһэ 16 чаастан күрэхтэһии бастакы түһүмэҕэ саҕаланна. Күрэхтэһии хаамыытынан, биир күҥҥэ биир түһүмэх буолар, уопсайа 4 чаас киирсэллэр. Онтон түмүк олунньу 1 күнүгэр тахсыаҕа. 7 бастыҥ саахыматчыт Россия Кубогар кыттар чиэһи ылыаҕа.
Бириис уопсай пуондата 1 мөл. 100 тыһ. солк. Маны таһынан анал бириистэр саастарынан уонна күрэхтэһии түмүгүнэн туттарыллар.
Салгыы саахымакка Ил Дархан Кубогын үөрүүлээх арыллыытын видеоҕа көрүҥ:
keskil14.ru