Сарсыардаттан дьиэ иһигэр оҕо, төрөппүт оскуолаҕа саҥа дьылы көрсөргө үөрүүлээх түбүгүрүү буолла. Лоп-бааччы 11 чааска 2023 сылы көрсөр үөрүүлээх бырааһынньык алын кылаас үөрэнээччилэригэр кэнсиэртэн, көрдөөх оонньууттан, оскуола директора Прокопий Устинович Никонов бастыҥ үөрэхтээх үөрэнээччилэргэ грамота туттарыытыттан саҕаланна.
Сүрүн тэрээһин остуоруйа күрэҕин көрүүтүнэн түмүктэннэ. Бастакы кылаас «Үрүҥ көмүс күлүүс» (А.Д. Егорова), иккис кылаас «Саһыл уонна куобах » (Т.В. Николаева), үһүс кылаас «Куттас куобах» (Л.В. Данилова), төрдүс кылаас «Моруос оҕонньор уонна куобах» (С.П. Адамова) остуоруйалары туруордулар. Остуоруйалары дьүүллүүр сүбэ сыаналаабытынан маннык буолла,1 миэстэ — 3 кылаас, 2 миэстэ — 1 кылаас, 3 миэстэ — 4 кылаас, 4 миэстэ — 2 кылаас.
Маны таһынан оҕолор мааскалара, уруһуйдара (темата: Моруос оҕонньор уонна Хаарчаана), араас матырыйаалтан оҥоһук (темата: «Хаар», «Сыл символа») сыаналананнар, кылаас аайыттан миэстэлэспит оҕолор Моруос оҕонньор илиититтэн грамота уонна бириис туттулар. Моруос оҕонньор эбии «мөһөөччүк» муҥунан бадаарак түҥэтэлээн, үөрүүлэрэ үрдээтэ. Өссө оскуола остолобуойугар соҕуруу дойду фруктата, эттээх бэрэскии, бурдук аһа, сок, минньигэс дэлэччи тардыллыбыт остуолугар тото-хана аһаатылар.
Манан бырааһынньык бүппэт, дьиэ иһигэр, дьиэ кэргэнинэн түмсэн үөрэ-көтө остуол тула олорон бырааһынньык аһа, бадаарак күүтэр.
Саҥа дьыл көрдөөх кэмэ салҕанар!
«Тымтык» эдкорпост, Ороһу.