Бүгүн Саха сиригэр Хомус күнэ бэлиэтэнэр. Сэтинньи 29 күнүгэр В.П. Ларионов аатынан Майа орто оскуолатыгар Аан дойдуга биллибит саха киэн туттар инструмена Хомус күнүн сарсыардаттан бэлиэтээтилэр.
Үөрүүлээх линейкаҕа күргүөмүнэн хомуһу 6 “а” кылаас (салайааччы Филиппова М.Д.), 11”а” кылаас (салайааччы Никанорова И.В), 8 “б” кылаас ( салайааччы Старостина О.П.) тыаһаттылар. Ону тэҥэ, оһуохайы Аман, Дархан Жирковтар эттилэр.
Бу күн бастакытын КМО иһинэн “Хомус баттл-2022” күөн күрэс ыытылынна. Ф.Г. Охлопков аатынан Майа орто оскуолата, И.Г. Тимофеев аатынан Майатааҕы лицей, И.Г. Игнатьев аатынан Хара успуорт оскуолата, Баатара орто оскуолата, Догдоҥо ситэтэ суох оскуолата биирдиилээн уонна бөлөҕүнэн дьүрүскэн тыастаах хомус түһүлгэтигэр кыттыыны ыллылар. Дьүүллүүр сүбэҕэ үлэлээтилэр: удьуор, Дархан уус, хомус маастара Виктор Иванович Захаров, хомус ууһа, алгысчыт, оһуохайдьыт Роман Владимирович Иванов, импровизатор хомусчут, Лука Турнин аатынан стипендия хаһаайына Игорь Николаевич Игнатьев, Саха Өрөспүүбүлүкэтин үөрэҕириитин туйгуна, кырыымпаһыт, муусука учуутала Раиса Александровна Скрябина. Бырайыак салайааччылара — В. П. Ларионов аатынан орто оскуола фольклорун уһуйааччылара В.Ф. Кривошапкина уонна У.М. Ефремова.
Күөн күрэс икки түһүмэҕинэн ыытылынна. Маҥнайгы түһүмэххэ кыттааччылар бэлэмнэнэн кэлбит айымньыларын тыаһаттылар, иккис түһүмэххэ талан ылбыт тиэмэнэн тута хоһуйдулар. Күрэх түмүгүнэн:
Бөлөҕүнэн толорууга лауреат үрдүк аатын сүктүлэр: “Тэбэнэт” фольклорнай бөлөх Баатара орто оскуолата; “Мандар хомус” Майатааҕы И.Г. Тимофеев аатынан лицей; “Сардаҥалар” И.Г. Игнатьев аатынан Хара успуорт оскуолата.
Биирдиилээн толорууга лауреат үрдүк аатын сүктүлэр: Айсен Пестряков, 6 “а” кылаас, В.П. Ларионов аатынан Майа орто оскуолата, Сайыына Егорова, 11 кылаас, И.Г. Игнатьев Хара успуорт оскуолата, Айыллаана Аринкина, 5 “б” кылаас, В.П. Ларионов аатынан Майа орто оскуолата;
Анал аат хаһаайыннарынан буоллулар: “Ымыылаах хомусчут” — Жора Федотов , 4 “г” кылаас, В.П. Ларионов аатынан Майа орто оскуолата; “Этигэн хомусчут” — Ваня Прохоров, 5 “а” кылаас, В.П. Ларионов аатынан Майа орто оскуолата.
Гран-при “Хомус Куо” — Вилена Птицына, 7 кылаас, Ф.Г. Охлопков аатынан оскуолата, Роман Владимирович Иванов бэйэтэ оҥорбут хомуһун бэлэхтээтэ;
Гран-при “Хомус Уолан” — Ярик Ощепков, 6 “а” кылаас, В.П. Ларионов аатынан орто оскуола, Виктор Иванович Захаров бэйэтэ оҥорбут хомуһун бэлэх уунна.
Хомус лыҥкынас тыаһынан өрө көтөҕүллэн учууталлыын, оҕолуун хомус күнүн уратытык бэлиэтээтибит.
«Мэҥэбил» пресс-киин, В.П. Ларионов аатынан Майа орто оскуолата.