Г.И. Чиряев аатынан 1 №–дээх оскуолаҕа Владимир Васильевич Васильев аатынан Бүлүүтээҕи норуодунай хора кэлэн, үөрэнээччилэри кытта көрсүһүү оҥордо. Көрсүһүү Саха өрөспүүбүлүкэтэ төрүттэммитэ 100 сылынан уонна үөрэнээччилэри дойдуга бэриниилээх буоларга, иитэр сыаллаах ыытылынна. Хору салайаллар Марфа Спиридоновна уонна Владимир Васильевич Васильевтар.
Аҕа дойду сэриитигэр, биир дойдулаахтарбыт хорсуннук сэриилэспиттэрин А.И. Николаев аатынан «Албан аат» музейын үлэһитэ Клара Егоровна Саввинова кэпсээтэ. Учуутал офицердар тустарынан кинигэ тахсыбытын билиһиннэрдэ. Ону таһынан хор кэлэктиибэ дойду араас куораттарыгар айаннарын уонна «Ильмен» ытык күөлгэ сылдьыыларын туһунан Евгений Романови Алексеев, Н.Г. Чернышевскай аатынан педагогическай колледж учуутала сиһилии кэпсээтэ.
Оҕолор саха бастакы профессиональнай композитора М.Н. Жирков олоҕун, айар үлэтин туһунан кэпсээтилэр. Кини суруйан хаалларбыт хас да ырыаларын ыллаан иһитиннэрдилэр. Үөрэнээччилэр олус элбэх билиини ылан, ырыаларын кэрэхсээн, астына истэн тарҕастылар.
Дарина АЛЕКСЕЕВА,
видеону таҥна Оля НИКОЛАЕВА,
8 кылаас үөрэнээччилэрэ.