Сарсын номнуо балаҕан ыйын 1 күнэ — Билии күнэ. Сарсыҥҥыттан саҥа үөрэх дьыла саҕаланар. Онтон быйылгы үөрэх дьылыгар кэккэ уларыйыылар киирбиттэрин туһунан Саха Өрөспүүбүлүкэтин Үөрэҕин уонна наукатын миниистирин бастакы солбуйааччытыттан Алевтина Петровна Аргуноваттан ыйыталастыбыт.
Хас үөрэх нэдиэлэтэ судаарыстыбаннай былаах көтөҕүүтүнэн саҕаланыа
Балаҕан ыйын 1 күнүттэн оскуолаларга, орто үөрэх тэрилтэлэригэр хас үөрэх нэдиэлэтэ судаарыстыбаннай былаах көтөҕүүтүнэн уонна «Разговоры о важном» диэн кылаас чааһыттан саҕаланар буолуоҕа. Кылаас чааһын сүрүн тиэмэлэрэ — дойдуга бэриниилээх буолуу, историческай сырдатыы, гражданскай иитии, үтүө майгы-сигили, экология буолуохтара.
Саҥа дуоһунас киирдэ
Балаҕан ыйын 1 күнүттэн биһиги өрөспүүбүлүкэбит «Патриотическое воспитание граждан РФ» диэн федеральнай бырагыраамаҕа киирэн, 484 оскуолаҕа «Советник директора по воспитанию и взаимодействию с детскими общественными объединениями» диэн саҥа дуоһунас киириэхтээх. Бу таһыччы оҕолор хамсааһыннарын уонна оҕолору кытары үлэлиир исписийэлиистэр.
Оҕолор уонна эдэр ыччат хамсааһына тэриллэр
Быйылгы үөрэх дьылыгар «Юнармия», «Орлята России», «Российское движение школьников» курдук бүтэһик сылларга ситиһиилээхтик үлэлээбит бырайыактарга уонна быйыл ылыллыбыт саҥа сокуоҥҥа олохтонон, Арассыыйатааҕы оҕолор уонна эдэр дьон хамсааһына тэриллиэҕэ. Бу хамсааһын тэриллиитигэр билигин СӨ Үөрэх уонна наука министиэристибэтэ, СӨ Ыччат дьыалаларын уонна дьиэ кэргэн бэлиитикэтин министиэристибэтэ, СӨ успуортка уонна физическэй култуураҕа министиэристибэтэ, СӨ Култуура уонна духуобунай сайдыы министиэристибэтэ, СӨ үлэ, социальнай сайдыы министиэристибэтэ тэҥҥэ үлэлэһэ сылдьаллар. Бу хамсааһыҥҥа оҕолор бэйэ салайыныыларын бырайыага тэҥҥэ киирсиэ диэн былаанныыбыт. Инньэ гынан оҕолор уопсастыбаннай тэрилтэлэрин үлэтин хааччыйарга оскуола аайы «Центр детских инициатив» баар буолуохтаах.
Оскуолаларга музей уонна театр баар буолуоҕа
Бу сылтан саҕалаан оскуола аайы музей уонна театр тэриллиитин үлэтэ саҕаланна. Ол түмүгүнэн 2024 сылга үөрэх туох баар кыһатыгар музей, театр баар буолан, үөрэх эйгэтин хааччыйыытыгар улахан ситиһии баар буолуоҕа.
Бэлэмнээтэ Анна СЛЕПЦОВА.