Атырдьах ыйын 19 күнэ. Иккис Ыспааһап ардаҕа тохтообокко түһэр. Ол да иһин Шамаевтар бүгүн өрөөн дьиэлэригэр бааллар. Ыал аҕата Александр Семенович, ийэлэрэ Айыына Николаевна элбэх хаһаайыстыбалаахтар. Сайын устата аҕыс төбө сылгыларыгар уонна сүөһүлэригэр от түбүгэр сылдьаллар. Бүгүн интервью ылар уолбут — ыал кырата, Айаал сэттис кылааһы бүтэрдэ. Убайа Коля Аллараа Бэстээх тимир суол кэллиэһин устудьуона, эдьиийэ уон биирис кылаас үөрэнээччитэ.
— Айаал, төһө сылгылааххытый?
— Биэс биэлээхпит, үһэ атыыр. Мантан иккитэ мииниллэр. Быйыл икки — кулунчуктаахпыт.
— Эн ат сүүрдүүтүгэр кыттаҕын. Хаһыс кылаастан кыттан саҕалаабыккыный?
— Билигин сүүрдэр атым Айхал үс саастаах. Биир саастааҕар убайым Коля айааһаабыта. Эһиилигэр маннааҕы Ыһыахха сүүрдүбүтүм.
— Бу атыҥ ханнык боруодаҕа киирсэрий?
— Айхал тулаайах биэ оҕото, аҕата ыраас хааннаах боруода атыыр. Ол иһин сиэнчэрдэргэ киирсэр.
— Хас күрэхтэһиигэ кытынныгыт?
— Элбэх. Дьөккөҥҥө, Бөтүҥҥэ, Бүлүүгэ улуус күрэхтэһиилэригэр миэстэлэстибит, маннааҕы ыһыахтарга былырыыҥҥаттан сүүрдэбит. Быйыл нэһилиэкпит ыһыаҕар сэрии бэтэрээнэ, кавалерист Потапов С.В оҕолоро туруорбут бирииһин туппутум.
— Өссө биир сүүрүк аккыт туһунан билиһиннэр.
— Бастакы сүүрүк аппыт Төкүнүк диэн ааттаах. Кини саха боруодата. Быйыл сааһа сүүрбэ иккитэ. Аан бастаан аҕабыт сүүрдүбүтэ. Онтон убайым Коля бэһис кылаастан сүүрдэн миэстэлэһэр этэ. Билигин кырдьан — мииниллэр миҥэ.
— Аты сүүрүк буоларыгар анаан эрчийэҕит дуо?
— Ат үчүгэй сүүрүк буоларыгар баайыытыттан улахан тутулуктаах. Онон элбэх үлэттэн тахсар.
— Оскуоланы бүтэрдэххинэ ким буолуоххун баҕараҕыный?
— Быраас буолар баҕалаахпын.
Айаалга инникитин даҕаны Айхалын кытта элбэх кыайыылары, баҕа санааҥ туоларыгар баҕарабын!
Григорьева Саяна,
VII кылаас,
Тааһаҕар, Бүлүү
1
Молодцы! Наһаа үчүгэй уол оҕо ат сүүрдүүтүнэн дьарыктанара.