Норуоттар икки ардыларынааҕы научнай оонньуулар бүгүн 4 күннэрэ. II C.Н. Донской аатынан үөрэҕи сайыннарар уонна учуутал идэтин таһымын үрдэтэр институкка, «Территория успеха» диэн үөрэхтээһин салон үлэтин иһинэн, «Российский и международный опыт работы с одаренными детьми» семинар ыытылынна. Техническэй хайысхалаах предметтэр учууталлара, учуонайдара мустубуттар.
Киирии тылы СӨ Наукалар Кыра Академияларын ректора Василий Климович Павлов ылла. Кини дойдубутугар баар көстөр-көстүбэт наукаҕа сыһыан кыһалҕатын бэлиэтээтэ. Этиитин түмүгэр чуолаан эттэ:
Атын дойдулары кытта тэҥнээтэххэ, биһиги көрдөрүүлэрбит намыһахтар. Ол иһин, оҕолорбут сайдалларын, үөрэххэ, билиигэ, наукаҕа тардыһалларын туһугар маннык хабааннаах тэрээһиннэр ыытыллаллар.
Бүгүҥҥү семинарга zoom-ситим нөҥүө быһа кэпсэтиилэр буоллулар. Индонезияттан Вардая колледжын учуутала, наука дуоктара Антон Вардая холбонно:
Биһиги өрөспүүбүлүкэбитигэр кэтэхтэн үөрэх сайдан турар. Тоҕо диэтэххэ, биһиэхэ элбэх арыылар(островтар) бааллар. Ханнык баҕар сайдыыны кытта тэҥҥэ хаамабыт. Эһиги этиигитигэр, ыҥырыыгытыгар тута сөбүлэспитим, астыммытым.
Физика учуутала, БКЭ-ҕа 100 бааллаах оҕолору бэлэмнээбит, Эрнест Трофимович Мярикянов мустан олорор учууталларга Сахабыт сиригэр физикаҕа ГКЭ, БКЭ көрдөрүүлэрэ намыһаҕын эттэ:
Тоҕо оннук буоларый? Мин санаабар, оҕолору кыра эрдэхтэриттэн утумнаахтык дьарыктыахха наада. Биһиги оҕолорбут ГКЭ, БКЭ туттараары сылдьан, номнуо идэлэрин талыахтаах саастарыгар, өйдөнөллөр, онтон ыарахаталлар. Физикаҕа орто бааллар — 48 тан 50-ҥа дылы.
Москваттан Дмитрий Зарубин, Пензаттан Роман Зайцев холбонон, истээччилэри кытта кэпсэттилэр, холобурдарын, уоппуттарын кытта үллэһиннилэр.
МГУ иһинэн үлэлиир Университетскай гимназия педагог-психолога Алиса Викторовна Жилинская наукаҕа маҥнайгы киэҥ хардыыларыгар хас биирдии оҕо син биир ыарахаттары көрсөрүн, бэринэр түгэннэр үөскүүллэрин сырдатта. Манна төрөппүтү кытта үлэ ыытыллар диэтэ.
Урааллааҕы үөрэхтээһин уонна наука киинин эдэр эрчимнээх үлэһитэ Александр Антонович Шендрик регионнарыгар үп-харчы кыһалҕата баарын үллэһиннэ, оҕолорго үксүгэр улахан сыаналаах бириистэр тиксибэттэр. Уонна бары кэриэтэ Москваҕа бараллар эбит. Ол эрээри, онтон толлубакка, оҕолору үрдүккэ көҕүлүүргэ ыҥырда.
Бу семинар билиҥҥи ыччат, нууччалыы эттэххэ, мотивацията үрдүүрүн туһугар туох үлэ-хамнас ыытыллыахтааҕын кэпсиир сыаллаах ааста. Араас регионнартан кэлбит учуонайдар, экспертэр уоппуттарын кытта үллэһиннилэр. Мунньах кыттыылаахтара саҥа сыаллары туруоруннулар, элбэҕи биллилэр-көрдүлэр.
Эльдар Садовников