Бүгүн ыам ыйын 19 күнүгэр Ытык-Күөлгэ Норуот айымньытын дьиэтигэр Бүтүн Сойуустааҕы пионерскай тэрилтэ 100 сыллаах үбүлүөйүгэр аналлаах үөрүүлээх тэрээһин ыытылынна.
Диана Сусова Тааттатааҕы «Yрдэл» оҕо хамсааһынын лидерэ Арассыыйа оскуола оҕолорун хамсааһынын туһунан санаатын эттэ.
«Мин санаабар оҕо хамсааһына диэн биир сыалга-сорукка түмсэн үлэлээһин, алтыһыы, опыт атастаһыы, бэйэ санаатын таба этинэргэ үөрэнии, элбэх доҕордонуу, араас талааннаах, дьоҕурдаах оҕолору кытта билсиһии.
Бу күн көлүөнэлэр көрсүһүүлэрэ үрдүк таһымҥа ааста. Хас биирдии нэһилиэк пионерскай сылларын санатар выставка туруорда, сыанаҕа тахсан речевкалаан оҕо кэмнээҕи сбордарын, кутаа тула түмсүүлэрин санаатылар. Биһиги Бүтүн Арассыыйатааҕы оҕо холбоһугун лидердара пионерияны кытта алтыһыыбыт үтүө санааланыыга, ылыммыт соругу толорууга, түмсүүлээх буолууга эбит», – кэпсээтэ Диана Сусова.
Диана этэринэн, билиҥҥи Арассыыйатааҕы оҕо хамсааһына урукку пионерия тэрилтэтин солбуйар күүс буолар. Оҕо хамсааһына уонна пионерия үлэлиир тэтимнэрэ биир, холобура: тимуровскай үлэлэр, оҕону иитии тэрээһиннэрэ, сиэр-майгы тутулун тутуһуу уонна түмсүү.
Диана Сусова, «Yрдэл» оҕо хамсааһынын лидерэ