2012 сылтан СӨ бэрэсидьиэнэ Егор Борисов Саха Өрөспүүбүлүкэтигэр Булчут күнүн туһунан 1224 №-дээх Ыйааҕынан сылын ахсын муус устар ый бастакы өрөбүлүгэр “Булчут күнэ” диэн анал тэрээһин ыытыллар буолла. Бу тэрээһиҥҥэ олоҕуран биһиги биир бастыҥ биолог учууталбыт, Саха сирин үөрэҕириитин туйгуна, саха бастакы бэрэсидьиэнэ Михаил Ефимович Николаев олохтообут «Знанием Победишь» мэтээл хаһаайына Михаил Гаврильевич Босиков сырдык аатын үйэтитэр муус устар 11 күнүгэр Уус-Алдан улууһун Чэриктэй орто оскуолатын баазатыгар ахсыс төгүлүн ыытыллар улуустааҕы “Сэргэх Бэргэн” диэн спортивнай булт оонньуута буолан ааста.
Улуус араас оскуолаларыттан оҕолор кэлэн көхтөөхтүк кыттан, атын оҕолору кытта бэйэлэрин холонон бардылар. Уопсайа 4 хамаанда: Өспөх, Дүпсүн, Сыырдаах уонна Чэриктэй үөрэнээччилэрэ кыттыыны ыллылар.
Күрэхпит 7 түһүмэхтэн турда. Ол курдук, хайыһар, сүүрүү, биатлон, сыал ытыы, буурдааһын, сүгэнэн ырааҕы быраҕыы, хомуур хапсаҕай, канат тардыһыы.
Мин оҕолор олус талааннаахтарын бэлиэтии көрбүтүм. Бэйэм сүүрүүгэ, сыал ытыытыгар, канат тардыһыытыгар кыттыбытым. Уонна атын оскуола оҕолорун кытта билсэн, кэпсэтэн күммүт олус үчүгэйдик интэриэһинэйдик ааста. Быйыл бастакыбын бу күрэххэ кытынным уонна олус сөбүлээтим.
Уонна биллэн турар, ким күүстээх, ким бэлэмнээх кыайыылаах үрдүк аатын сүгэн дьиэлэригэр үөрэн-көтөн төннүбүттэрэ. Ол курдук, бастакы миэстэни хас күрэх ахсын иннин биэрбэт Сыырдаах орто оскуолатын хамаандата, иккис миэстэни Өспөх уонна үһүс миэстэни Чэриктэй орто оскуолатын хамаандалара ыллылар. Ону таһынан араас анал ааттар, Михаил Гаврильевич бииргэ төрөөбүттэрин, кэргэнин, оҕолорун, доҕотторун, бииргэ үөрэммит кылааһын, однокурсниктарын, үөрэппит оҕолорун аатыттан сыаналаах бириистэр туттарыллыбыттара.
Анал аат хаһаайыттара:
“Бастыҥ хайыһардьыт”
Уолаттарга Олесов Денис, Сыырдаах орто оскуолата (3 м 31 с).
Кыргыттарга Румянцева Саина, Чэриктэй орто оскуолата (4 м 49 с).
“Тоҥуу хаарынан бастыҥ сүүрүк”
Уолаттарга Сивцев Айаал, Дүпсүн орто оскуолата (4 м 53 с).
Кыргыттарга Копырина Алиса, Сыырдаах орто оскуолата (5 м 14 с).
“Сыалынан ытыы”
Уолаттарга Иванов Илья, Өспөх орто оскуолата (1 м).
Петухова Валерия, Сыырдаах орто оскуолата (2 м 25 с).
“Ырааҕы быраҕыы”
Готовцев Никита, Өспөх орто оскуолата (36,05).
Петухова Валерия, Сыырдаах орто оскуолата (14,49).
“Бастыҥ буурдьут”
Соловьев Никита, Дүпсүн орто оскуолата (35 с).
“Бастыҥ суолдьут”
Шелковников Николай, Чэриктэй орто оскуолата.
Бу күрэххэ кыттаммын олус үөрдүм. Аныгыскы тэрээһиҥҥэ кэлэн кыттыыны ыларгытыгар ыҥырабын. Ааттыын даҕаны киһини сэргэхситэр көхтөөх тэрээһин ааста!
Анжелика ГОРОХОВА,
Чэриктэй орто оскуолатын 8 кылааһын үөрэнээччитэ.