Саха норуодунай поэта Михаил Елисеевич Тимофеев 90 сылынан мусуой уруогар оскуолабыт учууталын кытта сибээстээх биир саҥаны биллибит.
Алын кылаастар учууталлара Раиса Егоровна аҕата Егор Федотович Егоров (1921-1978) эмиэ учуутал эбит. 1941 сыллаахха Бүлүү педучилищетын бүтэрбит, кэлин историк идэтигэр үөрэммит. Биһиги аҕа саастаах учууталларбытын географияҕа, историяҕа үөрэппит. “Киэҥ билиилээх, оҕолорго истиҥ сыһыаннаах учуутал этэ”, — диэн махтана ахталлар.
Егор Федотович манна, Тоҕуска, 1964 сыллаахха дьиэ кэргэниниин көһөн кэлбит. Ол иннигэр Бүлүү оройуонугар хас да оскуолаҕа сэбиэдиссэйинэн (дириэктэринэн), завуһунан, учууталынан үтүө суобастаахтык, бэриниилээхтик үлэлээбит.
Аҕа дойду улуу сэриитин саҕана военруктар курстарыгар үөрэммит, онон Бүлүү куоратыгар военрук-инструктор быһыытынан сэриигэ барар дьону бэлэмнээбит.
Егор Федотович барыта 34 сыл учууталлаабыт. Элбэх ахсааннаах үөрэппит оҕолоруттан өрөспүүбүлүкэҕэ биллэр дьон тахсыбыттар. Холобур, И.Е. Алексеев-Хомус Уйбаан, М.Е. Тимофеев уо.д.а.
Сэрии саҕана Дьооху оскуолатыгар учуутала маҥнай хайдах үлэлии кэлбитин туһунан Михаил Тимофеев “Чуораан тыаһа” (“Сэрии саҕана” сэһэн) диэн кэпсээҥҥэ наһаа үчүгэйдик суруйбут. Уонна 1973 сыллаахха “Умнубат оскуолам” диэн суруйбут поэматын тапталлаах учууталыгар анаабыт, “Учууталбар Е.Ф. Егоровка” диэбит.
Хомус норуоттар икки ардыларынааҕы Киинин президенэ Иван Егорович Алексеев-Хомус Уйбаан маҥнайгы учууталын Егор Федотович туһунан эмиэ “Холумтан сылааһа” диэн кинигэтигэр истиҥник ахтан ааспыт.
Егор Федотович ханна да үлэлээбитин иһин, учууталлыырын таһынан пропагандист, агитатор, лектор быһыытынан аан дойду сонунун кэпсиирин дьон сэҥээрэн истэр этэ диэн, ахтыыларга суруллубут. Мусуойга махтал суруктара, грамоталара бааллар. “1941-1945 сс. Аҕа дойду Улуу сэриитигэр килбиэннээх үлэтин иһин” уонна “1941-1945 сс. Аҕа дойду Улуу сэриитигэр Кыайыы 30 сыла” мэтээллэринэн наҕараадаламмыт.
“Егор Федотовиһы “Дьөгүөркэ учуутал” диэн ааттыыллара, гармошкаҕа оонньуура, “оһуохай тылын этэрэ ууһун-уранын истиэҥ этэ”, диэн ахтыбыттар.
Егор Федотович сэттэ оҕото бары үрдүк үөрэхтэммиттэр: үс кыыһа, үс сиэнэ эмиэ учуутал идэтин талбыттар. Кини олоҕун билигин сиэннэр, хос сиэннэр салгыыллар. Учууталга махталы биллэрэр истиҥ айымньылары, мусуойга баар матырыйааллары, Егор Федотович туһунан үөрэнээччилэрин, оҕолорун ахтыыларын ааҕаммыт элбэҕи биллибит, киэн тутуннубут.
Вера БОРИСОВА, Тина ИВАНОВА, VI кылаас
үөрэнээччилэрэ,
“Юный краевед” куруһуок иитиллээччилэрэ,
Тоҕус орто оскуолата, Бүлүү.