Аныгы үйэ ийэтэ диэн кимий? Мин санаабар билиҥҥи тэтимнээх олохпут сүүрээнигэр бириэмэтин сөпкө аттаран дьаһанар, оҕолорун чөл туруктаах, бары өттүнэн сайдыылаах гына иитэр, бары эйгэҕэ бэйэтин кыаҕын толору табыгастаахтык туттар эрчимнээх ийэ — бу аныгы үйэ ийэтэ дии саныыбын. Буолаары турар Саха сирин ийэлэрин күнүн көрсө биһиги куораппыт биир элбэх оҕолоох ыал мааны ийэтин Изольда Местникованы кытары кэпсэттим.
Изольда Местникованы саха тэлэбиидинньийэтин көрөөччүлэрэ билбиккит буолуо, кини «Асчыттар» диэн биэрии ыытааччыта. Кини аныгы үйэ ийэтэ буолан социальнай ситими олоҕор эмиэ дьүөрэлии тутар, Инстаграм сирэйигэр элбэх сурутааччылаах. Изольда онно бэйэтэ астаабыт минньигэс бүлүүдэлэрин ырысыаптарын эдэр хаһаайкалары, асчыт кыргыттары кытары үллэстэр, санаа атастаһар.
Онтон бу күһүҥҥүттэн, саҥа үөрэх дьыла саҕаланыаҕыттан ыла, улахан уола Семен ас астыыр видеоларын уган дьон сэҥээриитин ылла. Кинилэр оскуола оҕото илдьэ сылдьарыгар табыгастаах, чэпчэкитик астанар, тотоойу аһылыгы астаан, ырысыаптаах видео устан ийэ Инстаграмын сирэйигэр угаллар.
Номнуо «Үөрэнээччи өйүөтэ» диэн ааттаммыт рубрикалара киэҥ дьүүлгэ тахсан дьон биһирэбилин ылыан ылла. Оннооҕор Семен астаабыт видеолара «Саха» НКИК ханаалыгар «Амтан» диэн биэриигэ нэдиэлэҕэ иккитэ көстөр буолбут!
Мин ыал ийэтин кытары Изольда Местникованы кытары кэпсэттим:
— Карантин кэмигэр, эбии дьарыктар эҥин суох буоланнар, оҕобун тугунан эрэ дьарыктыырга санаммытым. Семен бэйэтэ астаары баҕалаах буолааччы, ол иһин чэпчэки рецептары устан Инстаграмҥа таһаарарга санаммытым. Оҕобор эппиппэр тутатына сөбүлэспитэ. Сурутааччылар түргэнник булалларын курдук, видеоларбытын хештегынан бэлиэтиибит. Маҥнай опрос оҥорон, онтон уолбун кытары маннык хештегтары талбыппыт #сиэнчиктиинастыахха #үөрэнээччиөйүөтэ #өйүөҕүнумнума. Оҕолор оскуолаҕа, эбии дьарыкка илдьэр астарын эрэ астыах буолбуппут, ол эрэн оҕо барыта астыыр аһа буоллун диэн түмүккэ кэлбиппит.
Уолум былырыыҥҥыттан астыан баҕарар буолбута. Бэйэтэ Интернет ситимигэр рецепт булан миэхэ туох наадалаах бородууктаны сакаастааччы. Билигин астыыр рецептэрбитин иккиэн тэҥҥэ толкуйдуубут. Семен видеоҕа уһулларын сөбүлүүр, мин санаабар уол да, кыыс да оҕо асчыт буолуохтаах. Кэлин бэйэтигэр олус туһалаах буолуоҕа. Уолум астаабыт аһын кэнники бэйэтэ иккистээн астаан хатылаан көрөр, ол курдук, мин дьиэбэр суох кэммэр, саҥа рецебы астаан быраатын аһаппыт этэ. Оҕону сүрүнэ бытовой тиэхиникэни сатаан туттарга үөрэтиэххэ наада, астаан баран хайаан даҕаны араарыахтааҕын эҥин туһунан кэпсээн туран.
Биһиги дьиэ кэргэн үс оҕолоохпут, улахаммыт 18 сааһа , Семен 11-рэ, кырабыт 6-тын туолаары сылдьар. Оҕолорум бары аска сыһыаннаахтар. Кыыспыт бэрэскини эҥин бэйэтэ астыыр. Кыра уол ас астыырга эмиэ кыттыһарын сөбүлүүр.
Төрөппүттэргэ этиэм этэ, оҕоҕут астыан баҕардаҕына, бобумаҥ. Сорох ийэ оҕо мэһэйдэһэр диэн санааттан, оҕо баҕатын бобон кэбиһэллэр, онтон оҕо баҕата сүтэн хаалыан сөп. Онон ийэлэргэ оҕолоргутун кытары тэҥҥэ астаан, оҕолоргутун кытары бириэмэҕитин бииргэ атаарыҥ диэн баҕа санаабын тиэрдиэм этэ. Уонна буолаары турар республикабыт Ийэлэрин кэрэ-бэлиэ бырааһынньыгынан бары үтүөнү баҕаран туран ис сүрэхпиттэн эҕэрдэлиибин!
Семен бэйэтэ «Центр глобального образования» гимназиятын 5 кылааһын үөрэнээччитэ:
— Мин астыырбын сөбүлүүбүн, Тик-токка рецептэри көрөөччүм, ийэбэр көрдөрөөччүм. Ийэм астыырын эмиэ көрөбүн. Астыыр диэн мин санаабар ыарахан, ол эрэн чэпчэки рецептэртэн саҕалаатахха, ким баҕарар астыы үөрэниэн сөп. Мин эбии баскетболунан дьарыктанабын, театр, омук тылын куруһуоктарыгар, бассейҥҥа сылдьабын.
Семен биһиги ааҕааччыларбытын кытары, чуолаан үүнээри турар Ийэ күнүгэр аналлаах биир минньигэс утах ырысыабын кытары үллэстэр. Оҕолоор, бырааһынньыктааҕы күн ийэлэргитин минньигэс коктейль оҥорон күндүлүүргүтүн ыҥырабыт. Оҕо бэйэтин илиитинэн оҥорбут бэлэҕиттэн күндү ийэҕэ туох даҕаны суох.
#Сиэнчиктиин астыахха
Банааннаах сакалааттаах коктейль
Биһиэхэ наада:
2 банан
500 мл тымныы үүт
200 гр ванильнай мороженай
2 ст. л. какао
Киэргэлгэ: маршмеллоу, сакалаат посыпката.
Бары ингредиеннэри холбоон блендердыыбыт, онтон стаканнарга кутан киэргэтэбит. Уонна чугас дьоҥҥутун күндүлүүгүт. Олус минньигэс буолар!
Кэпсэттэ Анна СЛЕПЦОВА.