Чɵл олоҕу тэнитэн, ГТО нуормаларын толорорго бэлэмнээн, доруобуйа сылыгар анаан, муус устар 9 күнүгэр оскуола профкома, физкультура учуутала М.К.Иванова, Е.Я. Куприянова, М.И. Афанасьева тэрийиилэринэн «Я — патриот» бырайыак чэрчитинэн региональнай байыаннай-спортивнай күрэхтэhии буолан ааста.
Уопсайа отучча оҕо кыттыылаах Бүлүү улууһуттан Хампа, Баппаҕаайы уонна Горнай улууһуттан Кэптин (Маалтааны) оскуолаларыттан 4 хамаанда куоталастылар. Бэйэбит оскуолабыт 2 хамаанданы тэрийэн туруорда.
Υгэс быhыытынан, сиэри-туому тутуhан, кэлбит кыттааччылары кѳрсѳн күрэҕи үѳрүүлээхтик арыйыы буолла. Оскуола дириэктэрэ Виталий Владиславович Макаров эҕэрдэлээн тыл эттэ, оскуолабыт туһунан сырдаппыта. Муусука учуутала Матрена Егоровна Кириллина алгыстаах тойугу туойда.
«Молодая гвардия» хамаанда, Баппаҕаайы
«Бэдэр» хамаанда, Кэптин
Бастакы түһүмэх визиткаттан саҕаланна. Манна бастакы миэстэни Кэптин «Бэдэр» хамаандата ылла. Нэhилиэктэрин уонна Кэптинтэн төрүттээх биллиилээх дьоннорун тустарынан кэпсээтилэр. Иккис миэстэ — «Молодая Гвардия», Баппаҕаайы, үһүс — «Тэтим», Баппаҕаайы, тѳрдүс миэстэ — «Кэскил», Хампа.
«Кэскил» хамаанда, Хампа.
Салгыы Калашников автоматын ыһан-хомуйан, саамай үчүгэй көрдөрүүлээхтэр Баппаҕаайы «Молодая Гвардия» хамаандаттан Георгий Шамаев уонна Чэмэлиинэ Николаева буолан, анал бирииһи туттулар.
«Тэтим» хамаанда, Баппаҕаайы,
Автомат маҕаһыынын снаряжениятыгар I миэстэни уолаттартан Коля Николаев (Баппаҕаайы, «Тэтим») уонна кыргыттартан Уйгулаана Пинигина (Хампа, «Кэскил») ыллылар. Эмиэ анал бирииһинэн наҕараадаланнылар.
Күрэхтэhии саамай сыраны, сытыыны-сымсаны, күүһү- уоҕу кѳрдѳрѳр түһүмэҕэ — мас хайытыы. Хамаандаттан 4 уол мас хайытар, онтон атыттара булгуччу «колодец» диэн ньыманан маһы саһаанныыллар. Бу түһүмэххэ Баппаҕаайы 2-с хамаандата, «Тэтим», бастаата. II миэстэни– Баппаҕаайы 1 хамаандата, «Молодая Гвардия», III – Хампа «Кэскил» хамаандата уонна IV– Кэптин «Бэдэр» хамаандата ыллылар.
Бүтэһик түһүмэх – таhырдьа кѳрдѳѳх эстафета. Эстафета 7 түһүмэхтээх:
— тоҥуу хаарынан сүүрүү;
— туут хайыhарынан сүүрүү;
— АК-74 сүгэ сылдьан сүүрэн тиийэн, воздушка саанан сыалы ытыы;
— автомат сүгэhэрдээх «челночнай» сүүрүү;
— автоматтаах сүүрэр уонна буукубалартан байыаннай тиэмэҕэ аналлаах тыл таhаарыахтаах;
-гранатаны ыраахха быраҕыы;
— салааскаҕа оҕону олордон сүүрүү.
Сыалы ытыыга 5 сыалтан «Бэдэр», «Тэтим» түөрдү, «Кэскил» 5, «Молодая Гвардия» биэс сыалы барытын таптылар.
Бу эстафетаҕа Баппаҕаайы «Молодая Гвардия» хамаандата бастакы буолла. Хампа хамаандата II, Кэптин III уонна бүтэhик Баппаҕаайы иккис хамаандата «Тэтим» буоллулар.
Тыҥааhыннаах күрэхтэhиигэ сиэрдээх дьүүллүүр сүбэҕэ А.В. Дьячковский, Д.М. Иванов, В.В. Макаров, спортивнай комментаторынан Д.Н.Андреева, операторынан С.С. Платонова, хаартыскаҕа түһэрээччинэн эдэр кэрэспэдьиэн Ринат Петров (10 кылаас) таhаарыылаахтык үлэлээтилэр. Оскуола профкомун кѳрдѳһүүтүн ылынан күүс – кѳмѳ, ѳйѳбүл буолбут спонсордар Н.Н. Алексеев, В.С. Иванов, Л.Д. Алексеева, Р.Д. Яковлева, М.И.Афанасьева, Е.Я.Куприянова, оскуола естественнэй-математическай методхолбоhугун салайааччыта Р.Р.Алексеева анаабыт үптэринэн кыттыбыт оҕолорго сыаналаах бириистэр туттарылыннылар.
Күрэхтэhии уопсай түмүгүнэн:
1 миэстэ — Баппаҕаайы 1 «Молодая Гвардия» хамаандата, салайааччы Е.Е.Степанов.
2 миэстэ –Баппаҕаайы 2 «Тэтим» хамаандата, салайааччы П.П. Огудов.
3 миэстэ–Хампа «Кэскил» хамаандата, салайааччы В.В.Серьгин уонна Кэптин «Бэдэр» кѳхтѳѳх хамаандата, салайааччы Г.Г. Григорьев.
Оҕолор саамай сэргээн уонна сөбүлүү көрбүт түһүмэхтэрэ эстафета эбит. Ол онтон саамай тоҥуу хаарынан сүүрэллэрин ѳйдѳѳн хааллыбыт диэн олус астына кэпсииллэр. Уолаттар мас хайыталларын интэриэһиргээн көрбүттэр. Кыттааччылар кыратык ыарырҕаппыт түгэннэрэ да баар. Ыалдьыттарбыт «ѳссө да кэлэ сылдьыахпыт» диэн билсибит–кѳрсүбүт дьон быhыытынан, үөрэн-көтөн, бары илии тутуурдаах дьиэлэрин диэки айаннаатылар.
Лена Никитина, Наташа Антонова, «Кѳмүс бѳрүѳ» пресс-киин. Илбэҥэ, Бүлүү.