В.П.Ларионов аатынан Майа орто оскуолатын 5 «а» кылааһын үөрэнээччилэрэ быйыл орто сүһүөх буоллулар. Учууталлара Парасковья Афанасьевна Харитонова салалтатынан оскуолаҕа, нэһилиэккэ араас тэрээһиннэри ыыталлар. Кылаас лидерэ Наташа Борисова кэпсиир.
Олоҕу кытта тэҥҥэ хардыылыыр, ситиһиигэ кынаттыыр оскуолабытын олус таптыыбыт. Саҥа үөрэх сылын волонтер хайысхатынан үлэлээн саҕалаатыбыт.Ураhалаах алааһын Аал Луук маһын таhын ыраастаабыппыт.
Кылааспыт оҕолоро, төрөппүттэрэ олус көхтөөхтөр. Бука бары сомоҕолоһон, араас бырайыактарга кыттабыт.
Быйыл кылааспытыгар саҥа оҕолор кэлбиттэринэн, «Бу — мин» диэн фотоколлаж онорбуппут. Онно хас биирдии үөрэнээччи ураты дьарыгын, дьиэ кэргэнин сырдатар хаартыскаларынан кэпсээн оҥорбута. Ол түмүгүнэн, ыкса билистибит, доҕордостубут.
Аныгы кэм оҕолоро буоларбыт быһыытынан, тэтимнээх олоҕу кытта тэҥҥэ хаамсан, сайдыылаах дьон буола улаатарга дьулуһабыт. Билиҥҥи кэтэхтэн үөрэнии кэмигэр көмпүүтэр бырагыраамаларын билии, төлөпүөн араас сыһыарыыларынан сатабыллаахтык туһаныы тыын боппуруос буолла. Онно сөп түбэһиннэрэн кылааһынан «Сосновый бор» тэрийбит «Прокачайся» лааҕырыгар дьарыктанныбыт. Видео уhула, монтажтыы үөрэммиппит.
Оскуолабыт бизнес-инкубаторын иһинэн араас бизнес-бырайыактары тэрийэбит. Быйылгы бырайыакпытын саха төрүт үгэһигэр тирэҕирэн оҥордубут. Сахалар былыргыттан оҕуһу иитэллэр. Оҕус сахаларга ытыктанар дьиэ сүөһүтэ буолар. Оҕуһу миинэр миҥэ, көлүнэр көлө оҥостоллор, таһаҕас таһаллар, бурдук ыһыытыгар, от үлэтигэр туһаналлар. Онон оҕус тулуур, дьулуур бэлиэтэ буолар. Оттон саха оҕолоро былыр талахтан оҕус, ынах оҥостон оонньууллара. Онно олоҕуран, биһиги талах оҕустардаах брелоктары оҥортоон атыылыырга сананныбыт. Маҥнай талах оҕустары хайдах оҥороллорун ыйыталастыбыт, талахтан оҕус оонньуутун быраабылатын үөрэттибит. Технология уруогар араас кээмэйдээх оҕустары оҥорбуппут. Брелоктарбыт олус чэпчэки ыйааһыннаах, көрөргө да ураты буоллулар. Дьон-сэргэ олус биһирээн, хамаҕатык атыыластылар.
Бу курдук, оҕо сааспыт тапталлаах оскуолабытыгар саҥа арыйыыларынан арыалланан, умнуллубаттык ааһар. Оскуолабытын 110 сыллаах үбүлүөйүнэн итиитик-истиҥник эҕэрдэлиибит!