Ньурба улууһун П.С.Егоров аатынан Акана орто оскуолатын 11 кылааһын үөрэнээччитэ Афанасий Лукин ааспыт сылы атааран, ситиһиилэрин, кыайыыларын ахтан ааһар.
— Ааһан эрэр 2020 сылы эргийэн көрөр эбит буоллахха, тус бэйэбэр, дьиэ кэргэммэр син сэмэй ситиһиилэрдээх сыл буолла. Ол курдук, сыл ОБЖ региональнай олимпиадатыгар кыттыыттан саҕаламмыта, бүтүүтүгэр эмиэ оройуоҥҥа география, ОБЖ предметтэригэр призердаатым. Пандемия буолуон иннинэ волейбол, баскетбол, строевой хаамыы күрэхтэригэр оройуоҥҥа 2-3 миэстэлэри ылары ситиспиппит.
Дьиэ кэргэмминээн сайын дьиэбитин өрөмүөннээбиппит, элбэх үлэ барбыта. Тыа оҕото буоларым быһыытынан, от-мас үлэтэ, сааскы, күһүҥҥү бултарга сылдьыы, бултуйан кэлэртэн үөрүү — бу барыта баара.
Туйгун үөрэхпин, олимпиадаларга, араас научно-практическай кэмпириэнсийэлэргэ, спортка ситиһиилэрбин бэлиэтээн, оскуолам аатыттан бу саҥа сылы көрсө, өрөспүүбүлүкэ Ил Дарханын Харыйатыгар ыҥырыллар, эҕэрдэтин тутар чиэскэ тигистим. Түгэнинэн туһанан учууталларбар, ийэбэр, аҕабар, бар дьоммор махталбын тиэрдэбин, кэлэн иһэр Саҥа 2021 сыл үгүс үөрүүнү, ситиһиини эрэ аҕаллын, бука бары доруобай, дьоллоох буолуҥ!