Кэбээйи оскуолатын биир бастыҥ туйгун үөрэнээччитэ – Егор Лугинов. Өссө тохсус кылааска үөрэнэ сылдьан регионнааҕы олимпиадаҕа экологияҕа уонна географияҕа призер буолбута. Кини туһунан учуутала, “Нуклеус” пост салайааччыта Вера Заровняева, кэпсиир.
Төрөппүттэрэ Татьяна Егоровна уонна Степан Васильевич Лугиновтар олох кыра эрдэхтэриттэн оҕолорун кытта араас интэриэһинэй кинигэлэри ааҕан, ырытан, үлэлэтэн утумнаахтык сайыннарбыттара. Улахан кыыстара Дарина оскуоланы туйгуннук бүтэрэн , ХИФУ Медицинскэй институтугар үөрэнэ сылдьар.
Кэбээйи чинчийээччи оҕолоро профессор П.А. Гоголеваны кытта
Егор саамай сөбүлүүр уруогун быһыытынан уруһуй уруогун ааттыыр. Онтон иллэҥ кэмигэр, быыс булла да, пластилинынан динозавр арааһын оҥорон, аатын-суолун, уратытын кэпсиэн сөп. “Бэйэбин өйдүөхпүттэн пластилинтан ырааппатаҕым. Бэйэм да билбэтим тоҕо сөбүлүүрбүн, үчүгэй баҕайы. Уопсайа 1000-н тахса динозавры оҥорбутум быһыылаах. Оскуола оҕолоругар сүрэҕэлдьээбэккэ үөрэниҥ, эрдэттэн элбэх араас идэни интэриэһиргээҥ, идэҕитин сөпкө талыҥ”, — диэн Егор кэпсиир уонна сүбэлиир.
Быйыл улууска Егор Лугинов экологияҕа уонна географияҕа эмиэ бастыҥ түмүктээх. Региональнай олимпиадаҕа табыллыыны уонна үрдүк ситиһиини, үүнэр 2021 cылга оскуоланы бүтэрэн сөбүлээн талбыт үөрэҕэр киирэригэр, үгүс үтүөнү, кэрэни уонна сырдыгы баҕарабын.