Дьааҥы улууһун Табалаах нэһилиэгэр Иннокентий Васильев кэнсиэрэ буолан ааста. Өрөспүүбүлүкэ барыта кинини Лэгэнтэй диэн аатынан билэр.
Сүрдээх үрдүк таһымнаах кэнсиэр буолан ааста. Лэгэнтэй ырыаларын мелодията сүрдээх тэтимнээхтэр, дьон бары үөрэ-көтө истэригэр ыллаһа олороллор. Ырыаларын ис хоһооно үчүгэйэ, тыла-өһө баайа. Үс сыл үөрэммит, ырыаҕа уһуйуллан тахсыбыт сирин туһунан сүрдээх истиҥник аҕынна. Көрөөччүлэри кытта алтыста, бэрт иһирэхтик кэпсэттэ.
Оһуобай кэнсиэр кэнниттэн уол аймаҕы, оҕотуттан кырдьаҕаһыгар тиийэ, мунньан истиҥник санаа атастаста. Элбэҕи сүбэлээтэ, биһиги дьиҥ саха ыччата буоларбытынан киэн туттуохтаахпыт, ол ааппытын мэлдьи үрдүк таһымҥа илдьэ сылдьыахтаахпыт туһунан киэҥ сирдэринэн сылдьыбыт киһи быһыытынан, ситэрэн-хоторон сиһилии кэпсээтэ. Ону таһынан, омук быһыытынан ийэ тылбытын баһылыахтаахпытын, тылбыт баар эрэ буоллаҕына, сахабыт тыла сүтүө суохтааҕын, ордук уол оҕо төрөөбүт дойдутугар бэриниилээх буолуохтааҕын дьэҥкэтик быһаарда.
Биһиги, уолаттар, урукку өттүгэр маннык толору астаах остуолга биллиилээх киһини кытта кэпсэтиигэ хаһан да сылдьа илик буоламмыт, сүрдээҕин астынныбыт. Киһи эрэ санаата үрдүккэ тардыһыах, кута-сүрэ бөҕөргүөх курдук!
Улахан махтал, биир дойдулаах киэн туттар ырыаһыппытыгар – Лэгэнтэйгэ!
Ааптар: Слепцов Николай, 9 кылаас.
1
Бэрт!