Дмитрий Васильевич Кустуров – киэҥ тиэмэни хабан суруйар профессионал-суруналыыс. Тылбаасчыт, кинигэлэр ааптардара, эрэдээктэр. Нууччалыы уонна сахалыы тылынан суруйар. Бүгүн 90 сааһын туолар бэлиэ күнэ.
Дмитрий Васильевич Кустуров — ССРС бэчээтин туйгуна, СӨ култууратын үтүөлээх үлэһитэ, П. А. Ойуунускай аатынан Государственнай бириэмийэ лауреата, Россияа, СӨ суруналыыстарын Сойууһун чилиэнэ, Томпо оройуонун, Таатта улууһун Бочуоттаах олохтооҕо, тыыл уонна үлэ бэтэрээнэ, суруналыыс-тылбаасчыт, суруйааччы.
Дмитрий Кустуров Томпо улууһун Кириэс Халдьаайы нэһилиэгэр 1929 сыл сэтинньи 8 күнүгэр төрөөбүтэ. М.Ломоносов аатынан Москватааҕы государственнай университет суруналыыстыка факультетыгар үөрэнэн суруналыыс аатын ылар. Дмитрий Васильевич колхозка үлэлиир аҥардас ийэлээх буолан, үөрэнэр сылларыгар Москва курдук сиргэ айаҕын ииттинэр харчытын бэйэтэ үлэлээн булунан, үөрэммитэ. Ол курдук үөрэххэ баҕата күүстээҕэ.
Дьокуускайдааҕы кинигэ издательствотыгар, ССРС наукатын академиятын Саха сиринээҕи филиалыгар научнай литература отделын эрэдээктэрдээбитэ. Хаһыаттарга 30-тан тахса сыл үлэлээбитэ. 20 тахса кинигэни нууччалыы тылбаастаабыта. «Нууччалыы-сахалыы тылдьыт» ааптардарыттан биирдэстэрэ. Д.В. Кустуров — 20-тэн тахса кинигэ ааптара. Ааҕааччыларга публицист быһыытынан киэҥник биллэр.
Саха сирин промышленноһын олохтонуута, сахалар Аҕа дойду сэриитигэр кыттыылара, 20-50 сыллардааҕы репррессия содула, уһук хоту дойду аҕыйах ахсааннаах норуоттарын олоҕо-дьаһаҕа, экономика, култуура — бу тиэмэлэргэ илиитин араарбакка үлэлиир.
Биир улахан өҥөтүнэн Аҕа дойду сэриитин биллиилээх снайнера Ф.М. Охлопков геройдуу охсуспутун архыып докумуоннарыгар олоҕуран дакаастаан, 1965 с. Сэбиэскэй Союз Геройун аатын иҥэриитин ситиспитэ буолар. Герой аатын иҥэриигэ туох баар кыhамньытын, дьулуурун, тулуурун ууран туран туруорсубута. Дмитрий Васильевич — Аҕа дойду сэриитин кыттыылаахтарын үйэтитэр «Память» кинигэ редакционнай коллегиятын чилиэнэ.
Репрессия ыар сылларыгар сымыйа балыырга түбэспит дьон үтүө аатын тилиннэриигэ үлэтэ биир улахан миэстэни ылар. Саха норуотун чулуу уола П. А. Ойуунускай олоҕун тиhэх сылларын чинчийэн, сырдык аата чиэстэнэрин ситиспитэ.
Төһө да 90 сааhын туоллар, күн бүгүнүгэр диэри суруналыыс быhыытынан суруйар, айар. Бүгүн «Тылбаасчыт бэлиэтээhиннэрэ» кинигэтин ааҕааччы илиитигэр тутта. Кинигэ « Көмүөл» издательствоҕа бэчээттэнэн таҕыста. Кустуровы саха саарына диэн биир санаанан өрө көтөҕүллэн туран ааттыыбыт. Ытыктабыллааах Дмитрий Васильевич оҕолорун, сиэннэрин тапталынан өссө да олорор, айар-тутар, суруйар кэскиллээх.
Дмитрий Кустуров олоҕо, үлэтэ-хамнаhа, ситиhиитэ оҕо, эдэр дьоҥҥо үтүө холобур буолар.
Ааптар: Ирина Харайданова, Томпо улууһун Кириэс Халдьаайы оскуолатын учуутала.