Бу санааларым барыта мин үөрэнэр оскуолабыттан оптуобуһунан Хаҥалас улууһугар айанныырбытыттан саҕаламмыттара. Оптуобус иһэ толору кыһыҥҥы оскуолаҕа МАН-ҥа үөрэнэ баран иһэр 7-8 кылаас үөрэнээччилэрэ этибит. Олортон улахан аҥаара онно хаста да сылдьыбыттар этэ. Онтон сорохтор уонна мин маҥнайгыбытын эрэ барбыппыт, онон төһө үчүгэй буолуоҕун өссө да билбэт этибит.
Биир чааһынан тиийбиппит. Өссө эбии атын оскуола оҕолоро кэлбиттэрэ. Мин көрүүбүнэн Хаҥалас улууһугар МАН дьиэтэ улахан көстүүлээх дьиэлэртэн биирдэстэрэ эбит. Кэлбит оҕолор онно киирэммит регистрацияламмыппыт, хосторбутунан тарҕаспыппыт. Дьэ ол кэннэ сарсыҥҥытыттан үөрэхпит саҕаламмыта. 3 күнү быһа мэлдьи режимынан олорбуппут: хас чааска аһыырбыт, утуйарбыт, үөрэнэрбит барыта сурулла сылдьар этэ. Минньигэстик аһаталлара, үчүгэйдик үөрэтэллэрэ.
Мин ордук технология уонна обществознание уруоктарын сөбүлээбитим, интэриэһиргээбитим. Технологияҕа мас оҥоһуктары кытта үлэлээбиппит уонна уруокка оҥорбут мастан конструкторы бэйэбитигэр босхо ылбыппыт. Ону тэҥэ 3д принтер хайдах үлэлиирин туһунан тиийимтиэтик кэпсээбиттэрэ. Онтон обществознаниеҕа биһиги үөрэнээччилэр улаатан баран туох үлэһит буолуохпутун сөбүн сабаҕалыыр интэриэһинэй чахчылар уонна тестар көмөлөрүнэн тус бэйэбит туһунан элбэҕи билбиппит. Бу олус туһалаах этэ.
Сороҕор биһиэхэ анаан араас тэрээһиннэри оҥорооччулара: головоломка таайааһына, киинэ көрөөһүнэ, дискотека, квиз уо. д.а. Маннык сэргэх тэрээһиннэргэ сылдьан бэйэ бэйэбитин кытта билсэн, атын үөрэнээччилэри кытта доҕордоспуппут.
Кылгастык эттэххэ, мин кыһыҥҥы МАН лааҕыры олус сөбүлээтим, барыта «чуоккай» этэ. Төттөрү барарга курус курдук да буолбута, барыахпын баҕарбатаҕым. Ол да буоллар, хата олус үчүгэй өйдөбүллэр хааллылар диэн үөрэбин. Кэлэр сайын хайаан да мин кылааспын кытта эмиэ МАН-ҥа барыаҕым.
Суруйда Таисия Портнягина, Дьокуускай куорат 12 №-дээх орто оскуола 8 «В» кылааһын үөрэнээччитэ.