Таатта улууһугар «Оҕо-аймах оһуохайын олохтуоҕуҥ!» түһүлгэ улуу суруйааччы, учуонай, бөдөҥ судаарыстыбаннай диэйэтэл Платон Алексеевич Ойуунускай төрөөбүт күнүгэр — Сэтинньи 11 күнүгэр ананан ыытылынна.
Бу бэлиэ күн улуустааҕы норуот айымньытын дьиэтин тэрийиитинэн түһүлгэҕэ улуус 9 нэһилиэгиттэн барыта 44 оһухай этээччитэ тоҕуоруһа түмсэн, оһуохайы оройуттан туттулар, чобуо куоластарынан күөн көрүстүлэр.
Быйылгы оҕо оһуохайын тиэмэтэ Норуоттар сомоҕолоһууларын сылыгар ананна. Ытык киһибит Борис Федорович Неустроев — Мандар Уус оһуордаан ойуулаабыт «Киҥкиниир киэҥ куйаарын анныгар» оһуохай төрүттэннэ.
Дьүүллүүр сүбэҕэ:
- СӨ үтүөлээх оһуохай этээччитэ, Таатта улууһун Оһуохай ассоциациятын бэрэссэдээтэлэ Иван Федотович Иванов;
- «Саха» көрдөрөр-иһитиннэрэр хампаанньа суруналыыһа Жанна Григорьевна Бурмистрова;
- «Күн Чөмчүүк» народнай фольклорнай ансаамбыл салайааччыта Наталья Ивановна Григорьева.
Кыттааччылар оһуохайга ураты талааннарын, уран тылларын, чобуо куоластарын көрдөрөн, кэрэхсэбиллээх күрэһи таһаардылар. Түмүккэ түһүлгэ кыайыылаахтара билиннилэр.
7-12 саастаахтарга:
1 ҮРДЭЛ — Попова Валерия, Чөркөөх;
2 ҮРДЭЛ — Харов Егор, Баайаҕа;
3 ҮРДЭЛ — Баратов Осман, Уус Таатта;
12-17 саастаахтарга:
1 ҮРДЭЛ — Лев Тарасов, Ытык Күөл;
2 ҮРДЭЛ — Павлова Маша, Ытык Күөл;
3 ҮРДЭЛ — Аржакова Алина, Ытык Күөл.
Анал ааттар:
1.«Бастыҥ кыначчыт» — Семенова Айаана, Уолба;
2.«Түөлбэ тылын тутааччы» — Харитонова Ирина;
3.«Эҥээркэй куоластаах этээччи» — Федорова Айсаана, Харбалаах;
4.«Чуор куоластаах этээччи» — Афанасьева Санаайа, Чөркөөх;
5.«Тэтимнээх этээччи» — Кычкин Алеша, Чычымах;
6.«Уран тыллаах этээччи» — Баратова Нелли Уус Таатта.
Бастыҥ кыттааччылар ахсынньы ыйга Туймаада хочотугар ыытыллар күрэскэ тапталлаах Таатталарын аатын үрдүккэ ааттатан, кыттыыны ылар чиэскэ тигистилэр. Таатта лицейиттэн Алина уонна Нюргуяна Аржаковалар баҕаран туран кытынныбыт.
https://vkvideo.ru/video-199463452_456245346«Таатталар маладьыастар. Улуус администрацията, Культура, Үөрэх управлениялара бары биир ситимҥэ үлэлээн, Саха төрүт үҥкүүтүгэр — оһуохайга суолта ууран, кэскиллээхтик дьаһанан тэрийбиттэриттэн астынабыт, үөрэбит. Бу курдук ыччаты, оҕолору кытта сыралаах үлэҕит үтүө өйдөбүллээх, түмүктээх буолуохтун!» — диэн Д.М. Пестряков санаатын үллэһиннэ.
Оһуохай тэтимигэр кыттыһар кэрэтиэн!
Нюргуяна Аржакова, Х кылаас үөрэнээччитэ, Таатта лицейэ