Сэтинньи 11 күнүгэр Кэбээйи орто оскуолатыгар сахалыы тыыннаах «Сэргэх сэрэдэ» буолан ааста. Бу тэрээһин оскуолабыт “7 эйгэ: төрөөбүт тыл түөлбэтэ” диэн бырайыагын чэрчитинэн үлэлээбитэ төрдүс сылыгар барда.
Сэтинньи – Байанай ыйа. Биһиги оскуола сарсыардабыт 8 чаастан Байанай ыйын үөрүүлээх арыллыытынан саҕаланна. Сахалыы симэммит 7 кылаас оҕолоро (кыл.сал. Дьячковская Т.О., Левина А.П.) үөрэнээччилэри, учууталлары уонна төрөппүттэри алгыстаах алаадьынан көрүстүлэр.
Саха тылын уруоктарыгар, кылаас чаастарга учууталлар сэтинньи ый суолтатын, бэлиэтин, сиэрин-туомун туһунан оҕолорго сырдаттылар, бу Байанай ыйа сахаларга тоҕо ордук суолталааҕын кэрэхсэбиллээхтик кэпсээтилэр. Маны таһынан уруоктарга сахалыы дьыктаан суруйдубут, саха төрүт оонньууларын оройуттан туттубут.
Оттон уруоктан сынньалаҥ кэмигэр оҕолор тыл оонньууларын, хабылыгы, ойбонтон уулааһыны о.д.а. тэрийдилэр. Көхтөөх оҕолор минньигэс кэмпиэт ылан, үөрдүлэр-көттүлэр.
Физкультура уруоктарыгар хабылык, хаамыска, ойбонтон уулааһын, хороҥ оту ыстаныы курдук саха төрүт оонньууларыгар күрэхтэстилэр, ким сымсата, күүстээҕэ билиннэ.
Бу тэрээһинтэн эбии үөрэхтээһин пелагогтара туора туран хаалбатылар, 1 этээскэ оҕо-аймах саҥатынан, күлүүтүнэн толору буолла. Кинилэр оҕолорго анаан хабылык–хаамыска, ат сүүрдүүтэ, тыксаан, “Саха тылын синонимнарын төһө билэҕиний?”, «Саха сирин кыыллара, үүнээйилэрэ, балыктара» диэн карточканан, «Сымса» хамсаныылаах оонньуулары тэрийэн, сахалыы тыыны уһугуннардылар.
Түмүктүүр тэрээһининэн учууталлар уонна үөрэнээччилэр хомуур хамаандаларга «Өркөн өй» диэн оонньуу-күрэх бэрт сэргэхтик уонна тыҥааһыннаахтык буолла. Саха тылын учууталлара Павлова М.Е. уонна Егорова М.И. норуот тылынан уус-уран айымньытыттан, саха тылын теориятыттан, саха литературатын историятыттан о.д.а ыйытыылары бэлэмнээн, ким тобуллаҕас өйдөөҕүн биллибит. Уопсайа алта хамаандаттан, икки бастыҥ хамаанда чорбойон таҕыста. Кыттыбыт учууталларга, үөрэнээччилэргэ барыларыгар Добун суругу уонна сэмэй бэлэҕи туттардылар.
Онон оҕолор бүгүн сэрэдэ күн араас остуол оонньуутун биллибит-көрдүбүт, төрөөбүт тылбытын байыттыбыт, элбэх оҕо төгүрүччү олорон, түмсэн, сахалыы оонньуулары сэҥээрбиттэрин көрөн, үөрдүбүт.
Оскуола салалтата бары көхтөөхтүк кыттыбыт кылаастарга, чуолаан 7 кылаас төрөппүттэригэр, саха тылын учууталларыгар, кылаас салайааччыларга, оонньуу ыыппыт оҕолорго махтал тылларын тиэрдэр.
Түмүктээх эттэххэ, күммүт көхтөөхтүк,сэргэхтик уонна олус туһалаахтык ааспытыттан үөрдүбүт.
Күндү оҕолор, сэтинньи ыйга айылҕалыын алтыһыҥ, өбүгэлэрбит муударастарын дириҥэтэн үөрэтиҥ, төрөөбүт тылгытын харыстааҥ!
Юнкордар: Карина Сыроватская, Марина Попова
Хаартыскаҕа, видеоҕа түһэрдэ: Анита Мартынова, Айыллаана Гуляева, Вася Ноговицын
«Дьоҕур» медиакиин, Кэбээйи орто оскуолата
Кэскил14.ру