Оскуолабытыгар үтүө үгэскэ кубулуйбут «Ийэ, аҕа уонна мин — успуорт дьиэ кэргэн» диэн успуорт уонна доҕордоһуу күрэҕэ олус сэргэхтик, өрө көтөҕүллүүлээхтик сэтинньи ый 9 күнүгэр буолан ааста.
Быйылгы күрэххэ күөн көрсөөрү икки хамаанда таҕыста: оскуолабыт маҥнайгы кылааһын үөрэнээччилэрин уонна төрөппүттэрин хамаандата, ону тэҥэ ыалдьыт быһыытынан — эһиил оскуола боруогун атыллыахтаах «Сарыал» оҕо уһуйаанын иитиллээччилэрин уонна төрөппүттэрин хамаандата.
Спорт саалатыгар оҕо мичээрэ, төрөппүт хайҕаллаах тыла уонна кыайыыга дьулуур тыына толору бааллара. Хас биирдии түһүмэх аайы икки хамаанда кыттааччылара сымсаларын, түмсүүлээхтэрин уонна кыайыыга дьулуурдарын көрдөрдүлэр. «Сарыал» уһуйаан кырачаан кыттааччылара убайдарыттан-эдьиийдэриттэн хаалсыбакка, олус хорсуннук уонна эрэллээхтик киирсибиттэрэ көрөөччүлэри сөхтөрдө.
Тыҥааһыннаах, ол эрээри олус истиҥ киирсии түмүгүнэн бочуоттаах бастакы миэстэни оскуолабыт маҥнайгы кылааһын оҕолорун уонна төрөппүттэрин хамаандата ылары ситистэ. Оттон «Сарыал» уһуйаан хамаандата улахан күрэххэ бастакы холонууларын ситиһиилээхтик ааһан, инникитин оскуолаҕа киирэллэригэр бэлэмнээхтэрин бигэргэттилэр.
Бу тэрээһин хас биирдии дьиэ кэргэҥҥэ умнуллубат үтүө түгэннэри, чэгиэн туругу уонна биир санаалаах буолуу үөрүүтүн бэлэхтээтэ. Кыттыбыт бары дьиэ кэргэттэргэ, тэрийээччилэргэ истиҥ махталбытын тиэрдэбит.
Кэскил14.ру
Н.И. Прокопьев аатынан Хатыы орто оскуолата