Сэтинньи 5 күнүгэр “Малдьаҕар сиэннэрэ” патриотическай кулууп взводтара анал байыаннай дьайыы кыттыылааҕар О. Львовка тимуровскай үлэ ыыттыбыт.
Уолаттар учууталларбытын Никифор Яковлевы, Вячеслав Максимовы, Александра Павлованы кытта оскуолаҕа мунньустан, үлэлиир сирбитигэр тиийбиппит. Үс гына арахсыбыппыт.
Биир бөлөх хаар күрдьээһинигэр, иккис бөлөх мас хайытааһыныгар, үһүс бөлөх саһаан туруоруутугар диэн ананан үлэлээтибит.
Мин мас хайытааһыныгар сырыттым, тоҕо диэтэххэ мин мас хайыта үөрүйэхпин, дьиэбэр оттор маһы хаһыс да сылын бэйэм бэлэмниибин. Миэхэ бу үлэ ыарахан буолбатах этэ.
Биир чаас устата уолаттар бары үлэлээн, биһиги иннибитигэр турбут соругу толордубут, үлэбит түмүгүттэн астынныбыт.
Бу күн биһиги О. Львовы кытта ирэ-хоро кэпсэттибит, кини биһиэхэ Чечня сэриитигэр наҕараадаламмыт “Мужество” уордьанын көрдөрбүтэ.
Аман Еремеев,М.Е.Васильева аатынан 2 Малдьаҕар орто оскуолатын 11 кылааһын үөрэнээччитэ, “УОТ” медиакиин