Күһүҥҥү сынньалаҥ биһиэхэ коммунарскай сбортан саҕаланна. Ол курдук алтынньы 24 күнүгэр Чурапчы гимназиятын, Хадаар, Чурапчы Мурун оскуолаларын үөрэнээччиллэрэ Хатылы оскуолатыгар түмүстүбүт.
Хатылы оскуолата киэҥ, улахан уонна сырдык. Суруйааччы В.С. Соловьев Болот Боотур аатын сүгэр. Оскуолаҕа киирэккин кытта хаҥас өттүгэр кини туһунан кэпсиир анал хос баар.
Коммунарскай сбор хас биирдии оскуола бэйэтин билиһиннэриититтэн саҕаланна. Холобур, биһиги гитараҕа «Доҕотторбор» диэн ырыаны ыллаатыбыт. Онтон атын оскуолалар үҥкүүлээтилэр, ыллаатылар.
Ол кэнниттэн Хатылы оскуолатын учууталлара Бастыҥнар хамсааһыннарын уонна искусственный интеллеги хайдах ханна сөпкө туттар туһунан кэпсээтилэр.
Коммунарскай сбор биир саамай сүрүнэ – хамаанданан оонньуу. Уопсайа 7 хамаанда бары бииргэ тутуспутунан кылаастарынан сылдьан сорудахтары толордубут. Биһиги хамаандабыт аата – «Ый». Девизпыт – «Ый курдук сырдык хараҥаҕа көмө». Биһиги бары бииргэ эйэлээхтик оонньоотубут. Оонньуу түмүгүнэн бастакы миэстэни «Байанай» хамаанда ылла.
Өссө хамаандалар бары кылгас КВН нүөмэрдэри көрдөрдүбүт. Тиэмэтэ –«Арай биирдэ оскуолаҕа». Ол кэнниттэн дискотека буолла. Биир умнуллубат түгэнинэн бары бииргэ олорон гитаранан ыллаатыбыт.
Коммунарскай сборга бары бииргэ тутуһан сылдьыбыппытын ордук сөбүлээтим. Манна эйигин соҕотохтуу хаалларбаттар. Элбэх саҥа оҕону кытта билистим.
Мин санаабар, оҕо маннык тэрээһиннэргэ сылдьан дьону кытта алтыһа үөрэнэр, бэйэтин үтүө хаачыстыбаларын арыйар.
Виталий ОРЛОВ, Х кылаас,
С.Д. Флегонтов аатынан Хадаар орто оскуолата, Чурапчы