—Үтүө күнүнэн, Тихон Александрович! Оскуола саҥа үөрэх сылын хайдах бэлэмнээх көрүстэ, өрөмүөн үлэтэ кэмигэр түмүктэммитэ дуо?
—Үтүө күнүнэн, Айтал! 2026 — 2027 үөрэх сылын толору бэлэмнээх көрүстүбүт. Балаҕан ыйын 1 күнүттэн хойутааһына суох үлэбитин саҕалаабыппыт.
—Быйыл хас оҕо бастакы кылааска үөрэнэ киирдэ?
—1-кы кылааска 11 оҕо үөрэнэ киирдэ. Кылаас салайааччытынан СӨ үөрэҕириитин туйгуна Зоя Ивановна Васильева үлэлиир.
-Оскуолаҕа бары предмеккэ анал идэлээх учууталлар бааллар дуо эбэтэр аһаҕас вакансия баар дуу?
—Быйылгы сылга аһаҕас вакансия суох. Учууталларбыт олохтоох бэйэбит дьоммут буолаллар. Математикаҕа Екатерина Афанасьевна Перевалова толору чааска киирэн үлэлээн эрэр. Онон бары предмеккэ учууталынан хааччыллан олоробут.
-Саҥа үөрэх сылын оскуола туох ситиһиилээх көрүстэ?
-Оскуолабыт Наталья Матвеевна Степанова салайааччылаах » Школьный дозор» этэрээтэ Бүтүн Россиятааҕы быыһыыр этэрээттэр күрэхтэригэр Хабаровскайга баран ситиһиилээхтик кыттан кэллэ. Эдэр, кэскиллээх учууталбыт физкультураны уонна ОБЗР үөрэтэр Радомир Алексеевич Руфов ситиһиилээх үлэтин иһин «Надежда Якутии» анал бэлиэнэн наҕараадаланна. Бу эдэр учуутал үлэтин билинии, инникигэ көҕүлээһин буолар.
—Быйылгы выпускниктар ханнык үөрэх кыһаларыгар үөрэнэ киирдилэр?
—Выпускниктарбыт бары Саха сирин үөрэҕин кыһаларыгар үөрэнэ сылдьаллар. М. К. Аммосов аатынан ХИФУ коллеһыгар, Дьокуускайдааҕы финансовай-экономическай, педагогическай, авиа-техническэй, Бүлүүтээҕи, Намнааҕы педагогическай колледжтарга анал идэҕэ үөрэхтэрин саҕалаатылар.
—Бу үөрэх дьылыгар үөрэнээччилэри ханнык уларыйыылар эбэтэр саҥа үөрэх бырайыактара күүтэллэрий?
—Быйыл ОБЗР (Основы безопасности и защиты Родины) предмет киирэн үөрэтиллэн эрэр. Ону таһынан 5 кылаастарга 1-2 үөрэх чиэппэригэр Духовно-нравственная культура России предмет үөрэтиллэр, салгыы икки чиэппэргэ Культура народов РС(Я) үөрэтиэхтээхпит.
—Оҕолорго, учууталларга, төрөппүттэргэ үтүө баҕарыыларгын тириэрдэҕин?
—Оҕолорбутугар кыһамньылаах, ситиһиилээх үөрэҕи, төрөппүттэрбит биһигини кытта тэҥҥэ үлэлэһэн, көмө-тирэх буолалларыгар, учууталларга айымньылаах үлэни баҕарабын!
-Тихон Александрович, ыйытыыларбар эппиэттээбиккэр махтал.
Оскуола — оҕо билии эрэ ылар сирэ буолбатах, бу биһиги олоххо бэлэмнэнэр, билиҥҥи тэтимнээх, сайдыылаах кэмҥэ бэйэбит миэстэбитин булунарбытыгар сүрүн оруоллаах.
Учуутал, үөрэнээччи, төрөппүт ситимнээх үлэтэ биһиги өй-санаа, сиэр-майгы өттүнэн улаатарбытыгар, сайдарбытыгар уонна дойдубут кэскилигэр улахан суолталаах.
Сиһилии видео-матырыйаалга көрүҥ:
Кэпсэттэ: Айтал Ксенофонтов, 9 кылаас,
Карина Новгородова, 7 кылаас, «Эрчим» медиакиин, Дүллүкү орто оскуолата, Үөһээ Бүлүү