А.Н. Чусовской аатынан Ньурбатааҕы техническэй лиссиэй дириэктэрин Иван Гаврильевич Тобоновтуун оскуола медиа-киинин эдкордара атах тэпсэн олорон кэпсэттибит.
— Үтүө күнүнэн, Иван Гаврильевич! Быйылгы үөрэх дьылыгар саҥа үлэһиттэринэн хааччыллыы хайдаҕый? Быйыл лиссиэйгэ туох саңа дуоһунастар көрүлүннүлэр?
— Үтүө күнүнэн! Быйыл модульнай штат расписаниятынан үөрэх чааһын секретара, методист, тьютор диэн дуоһунастар баар буоллулар. Хаһаайыстыба өттүгэр штаттар эбии көрүлүннүлэр. Быйылгы үөрэх дьылыгар биһиэхэ биир саҥа үлэһиттээхпит. Кини «Земскэй учуутал» диэн бырагырааманан кэллэ. 2,5 сыл математикаҕа эбии учуутала суох олорбуппут. Учууталларбыт улахан ноҕоруускаҕа сылдьыбыттара. «Земскэй учуутал» бырагырааматыгар киирэммит, үлэлэһэммит, лиссиэйбит выпускницата Назарова Майя Анатольевна математика уонна информатика учууталынан үлэлии киирдэ. Кини икки профильга үөрэтиэҕэ: математикаҕа уонна информатикаҕа.
— Былырыын биһиги лиссиэйбит «Земский учитель» бырагыраамаҕа кыттар чиэскэ тиксибитэ. Манна хайдах кыттыыны ылар эбиттэрин кылгастык кэпсиэҥ дуо?
— «Земскэй учуутал» бырагыраама баарын аан бастаан саҕаланарыгар, алта сыл анараа өттүгэр Семен Семенович Сюльскай аатынан оскуолаҕа директорынан үлэлии сылдьан билбитим. Тысова Власта диэн английскай учуутала кэлэн үлэлээбитэ. Кини олус таһаарыылаахтык үлэлээн ааспыта. Хайалаах Алтай үтүөлээх учуутала кэлэн биэс сыл үтүө суобастаахтык үлэлээн барбыта. Быйыл «Земскэй учуутал» бырагырааманан бэйэбит выпускницабыт кэлэн, үөрүүбүт үгүс.
— Бу математика учууталын дуоһунаһыгар саамай ыраахтан хантан резюме кэлбитэй?
— Саамай ыраах резюмебыт математика предметын учууталыгар Хабаровскай кыраайтан кэлэ сылдьыбыта.
— Кыайбыт учуутал хайдах усулуобуйаҕа тиийэн кэлэрий? Ханна олорор, эбии туох чаастардааҕый?
— Биһиги олорор сиринэн хааччыйыахтаахпыт. Былырыын Ньурба оройуонун үөрэҕирии салалтатын салайааччыта Федор Федорович Ушканов туруорсуутунан эдэр учууталларга үчүгэй хааччыллыылаах уопсай дьиэ оҥоһуллубута, иккис сылын үлэлээтэ.
— Сөп, биһиги сотору кэминэн эбии Майя Анатольевнаттан бэйэтиттэн туспа интервью ылыахпыт. Онтон инникигэ өссө туох былаан баарый?
— Майя Анатольевна уруоктарыгар сылдьыахпыт, уруок хаачыстыбатын, хайдах бэриллэрин көрө, көмө быһыытынан сылдьыахпыт. Биһиги оскуолабыт ирдэбилэ улахан. Үлэ хаачыстыбата хайдах барыахтааҕын билиһиннэриэхпит. Биһиэхэ икки төгүл үөрүүлээх буолар бэйэбит үөрэнээччибит үлэлии кэлбитэ. Инники былааҥҥыт диэтэххитинэ, быйылгы үөрэх дьылыгар кыра уларыйыылар киирэ тураллар. Патриотическай иитиигэ, дойдуга бэриниилээх оҕолору үөрэтэн таһаарыахтаахпыт. Кабинеттар, тэрээһиннэр өттүгэр үлэлэһэ сылдьабыт. Эһиилги IX Спортивнай оонньууларга үлэ бара турар. Оскуолабыт гарааһын альтернативнай источникка көһөрөн эрэбит. Оҕолорбут олорор интернаттарыгар улахан үлэ бара турар.
— Иван Гаврильевич, кэпсэтиибит иһин улахан махтал. Көрсүөххэ диэри!
— Эһиэхэ махтал! Өссө да боппуруоста киирэн ыйыталаһаарыҥ, хоруй ылыаххыт. Экзамен, үөрэххэ киирии өттүгэр бу сылга олус үчүгэй көрдөрүүлэр таҕыстылар. Түгэнинэн туһанан, махтал тылларын этэбин, бастатан туран, убаастабыллаах учууталларбытыгар, кэлэктииппэр, тапталлаах төрөппүттэрбитигэр, куруук күүс-көмө буолалларыгар уонна саамай эрэнэр кэнчээри кэскиллэрбитигэр, оҕолорбутугар улахан махталы биллэрэбит!
Кэпсэтиини ыыттылар Камила Иванова уонна Сардаана Попова, 8-а кылаас үөрэнээччилэрэ.
Ыстатыйаны суруйда Нария Егорова, 10-а кылаас үөрэнээччитэ.
«Обьектив» медиа-киин, Ньурба техническэй лиссиэйэ.
Кэскил14.ру