Көмүс күһүн тиһэх күннэрин былдьаһа, Кэбээйи орто оскуолатыгар күүтүүлээх күһүҥҥү дьаарбаҥка буолан ааста.
Бу күн сайыны быһа чуҥкуйан турбут оскуолабыт тиэргэнэ оҕо-аймах саҥатынан-иҥэтинэн туолла. Ону кытта тэҥҥэ саҥа буспут бурдук аһын, самаан сайыммыт быйаҥын дыргыл сытынан эмиэ тунуйда. Быйылгы дьаарбаҥка норуоттар сомоҕолоһууларын сылыгар ананнна. Тэрээһиҥҥэ алын кылаас үөрэнээччилэриттэн саҕалаан, үрдүкү сүһүөххэ диэри кылаастар уонна төрөппүттэр бары кытынныбыт. Оҕолор кылаастары барытын кэрийэн көрдүбүт. Онно бааллара – саха норуотун килэччи буспут лэппиэскэтэ, эбээннэр мааны астара таба тыла, сыата, грузин омук чахохвилита, шашлыга, нууччалар балыктара, бурдук астара, сибиэһэй оҕуруот аһа, эт аһылык, барыанньа арааһа. Маны таһынан хас биирдии кылаас бэйэтин миэстэтин кэрэтик да киэргэтэн, ис дууһатыттан кыһаллан бэлэмнэммиттэрэ көстөр этэ. Биһиги өрөспүүбүлүкэбитигэр элбэх омук иллээхтик олорор дойдута буоларын бу күн бары итэҕэйдибит уонна үөрдүбүт.
Куонкуруска биһиги, 8 «а» кылаастар, эмиэ кыттынныбыт. Биһиги төрөөбүт сахабыт култууратын таламмыт, хотугу дойдубут баайын-дуолун бүтүн оскуолаҕа билиһиннэрбиппит. Оҕолор өбүгэлэрбит былыргы ырысыаптарынан төрүт аспытын астаан аҕаллылар. Биһиги остуолбутугар саха маанылаах аһа — ууга буспут мунду, собо, минньигэс көбүөрдээх лэппиэскэ уонна да атын саха аһын бастыҥа бааллара. Остуолу эрэ тардыынан муҥурдамматыбыт. Биһиги хамаандабыт дьүүллүүр сүбэҕэ уонна ыалдьыттарбытыгар дьиҥнээх гастрономическай экскурсия ыыттыбыт: ас аайы туспа историяны кэпсээтибит, саха итэҕэлигэр, олоҕор туох суолталааҕын быһаардыбыт. Дьүүллүүр сүбэ биһигини асчыттарбытын эрэ буолбакка, тиэмэни дириҥник хорутан үөрэппиппитин үрдүктүк сыаналаата. Онон, дьаарбаҥканы тэрийбит учууталларга уонна көмөлөспүт төрөппүттэрбитигэр махталбытын тиэрдэбит. Оҕолоор, бэйэ-бэйэбитин сыаналыахха уонна биир сомоҕо, иллээх дьиэ кэргэн буолуохха.
Марина Попова, Кэбээйи орто оскуолата, «Дьоҕур» медиакиин
Кэскил14.ру