Дьокуускай куоракка Соҕуруу Кэриэйэ «Хванчхон» оҕо хорун кэнсиэрэ буолла. 2008 с. тэриллибит 40-тэн тахса оҕолоох хор биһиги куораппытыгар буор босхо ырыа киэһэтин бэлэхтээтэ. Кэриэйэҕэ олох кыра саастарыттан муусукаҕа сыстан улааталлара, киһи хараҕар тута быраҕыллар. Айылҕа, доҕордоһуу, истиҥ сыһыан, сиэрдээх быһыы-майгы туһунан ырыалары дуоһуйа иһиттибит.
Пианист уонна дирижер салайыытынан оҕолор тыыннаах куоластара ураты музыкальнай инструменнар дорҕооннорун курдук иһилиннэ. Кырачаан оҕолор куоластара күүһүн киһи сөҕөр. Оҕолор барахсаттар сирэйдэрэ-харахтара сэргэх, сылайбыттара биллибэт. Ырыаҕа сөп түбэһиннэрэн хамсаналлара олус имигэс. Төһө да омуктуу ыллаабыттарын иһин, көрөөччүлэри кытта ситим кэнсиэр саҕаланыаҕыттан олохтоммута. Саалаҕа мустубут истээччилэр бу истиҥ эйгэни тута иҥэриммиттэрэ.
Дирижер хас биирдии хамсаныыта саала иһин абылаата. Ол курдук, кини оҕолор ырыаларын музыкальнай аккордун быыһыгар көрөөччүлэри ытыстарын тыаһаттаран, көстүбэт ситими олохтоон, дууһабытынан бары тэҥҥэ ыллаһа олорорбутун ситистэ. Куолас оонньооһунунан уонна туттан-хаптан, ырыа ис хоһоонун тиэрдэр бу олус сыралаах, иилистиилээх үлэ эбээт! Көрөөччүлэр кэнсиэр хара саҕаланыаҕыттан бүтүөр диэри уҕараабат дохсун ытыс тыаһынан, “браво”, “биис” хаһыы доҕуһуолунан көрдүлэр.
Аны ырыаларын ааттара да киһи санаатын өрө көтөҕөр. Холобур, “Табыллыбат да түгэн — үчүгэйгэ”, “Куустуһуу – истиҥ сыһыан”.
Кэнсиэр бүппүтүн кэнниттэн көрөөччүлэр оҕолору кытта хаартыскаҕа түстүлэр. Сибэкки дьөрбөтүн туппут ол киэһэ дьоруойдара дьоллоох харахтарын мичээринэн биһигини атаарбыттара. Мин ырыа түмэр, доҕордоһор, сомоҕолуур, эйэлээх буоларга ыҥырар, иитэр күүһүн тарҕатар оҕолорго махтана, долгуйа, “Сэргэлээх уоттара” култуура киин аанын саппытым.
Бу кэнсиэргэ кэлбит дьон астынар кэпсэтиилэрин дорҕооно, Дьокуускай киэһээҥи суугуна уонна кэриэйдии ырыалар матыыптара — барыта холбоһон, ураты доҕордоһуу ырыата буолан өргө диэри кулгаахпар иһиллибитэ…
Ирина Харайданова, Томпо улууһун Кириэс-Халдьаайы оскуолатын саха тылын уонна литературатын учуутала.