Күндү үөрэнээччилэр, убаастабыллаах учууталлар, төрөппүттэр!
Барыгытын саҥа үөрэх дьыла саҕаламмытынан СӨ үөрэҕириигэ уонна билимҥэ министиэристибэтин, тус бэйэм ааппыттан итиитик-истиҥник эҕэрдэлиибин!
Саҥа үөрэх дьылыгар биһиги олохпутугар саҥа сүүрээннэр киирэллэр. Үөрэх кыһаларагар история хайысхатынан кэҥэтии барар, обществознание биридимиэтэ 9-11 кылаастарга эрэ баар буолуоҕа. Былырыыҥҥы үөрэх дьылыгар «Биһиги дойдубут историята» диэн биридимиэти киллэрбиппит, ону быйыл эмиэ кэҥэтэбит. Маны сэргэ үһүс чиэппэртэн «Духовно-нравственная культура России» диэн уруок киириэҕэ. Иитии өттүгэр оҕолорго саҥа сыанабыл киирэр, ол курдук «сөптөөх», «сөбө суох» уонна «уһулуччу үчүгэй» диэн сыана турар буолуоҕа. Бастаан апробация быһыытынан 10 оскуолаҕа киллэриэхпит, устунан өрөспүүбүлүкэ бары оскуолаларыгар киириэҕэ.
Үүммүт үөрэх дьыла үгүс билиини-көрүүнү, эрэллээх доҕоттору бэлэхтээтин, үлэҕэ-үөрэххэ үгүс ситиһии, кыайыы-хотуу кэлэ турдун! Бука бары дьоллоох-соргулаах, чэгиэн-чэбдик буолуҥ!
Нюргуна Афанасьевна Соколова, СӨ үөрэҕириигэ уонна билимҥэ миниистирэ
Кэскил14.ру