Харбалаахха икки ый устата «Хамсаныы – бу олох төрдө» бырайыак иһинэн араас чэбдигирдэр, доруобуйаны көрүнэр тэрээһиннэрэ буоллулар. Билэрбит курдук, билиҥҥи кэмҥэ оҕолор урукку курдук сибиэһэй салгыҥҥа оонньууллара сэдэх. Оҕо дьиэтигэр телевизорга, үксүн төлөппүөҥҥэ олороро элбээн иһэр бу, кырдьык, улахан кыһалҕа буолла, ону элбэх төрөппүт бэлиэтээн этэр буолла.
Оҕолор төлөпүөҥҥэ өр олороллорун кыччатарга араас ньымалары туһаныахха сөп. Ол курдук, «Теплица» түөлбэ оҕолорго, төрөппүттэргэ анаан араас чэбдигирдэр тэрээһиннэри ыытта. «Бииргэ оонньуубут, доруобуйабытын чэбдигирдэбит» диэн маастар-кылаастарга элбэх оҕо сырытта.
Бу тэрээһин сүрүн сыала – оҕолор уонна төрөппүттэр физическэй культураҕа уонна спорка интэриэстэрин көҕүлүүр, доруобуйаны харыстыырга үөрэтэр ис хоһоонноохтор.
Маастар-кылаастары физкультура инструктора Слепцова Т.П. уонна бырайыак хамаандата түмсэн ыытта. Араас оонньуулары, эрчиллиилэри көрдөрдүлэр, сөпкө оҥорор ньымалары үөрэттилэр, оҕолордуун, төрөппүттүүн тэҥҥэ көхтөөхтүк оонньоотулар. Маны таһынан, доруобуйа ыйа ыытылынна. Ол курдук «Уһугун уонна хамсан» диэн доруобуйа зарядката «Теплица» түөлбэ саҥа спортивнай былаассааккатыгар хас сарсыарда аайы эрдэһиттэри түмтэ. Кыттыбыт дьон чэбдигирэн, күннэрин сэргэхтик саҕалаатылар. «Күн аайы 10 000 хаамыы» диэн челлендж саҕаламмытын биллэрдилэр. Бу тэрээһин оҕолору уонна төрөппүттэри күн аайы элбэхтик хаамарга, хамсанарга ыҥырар.
Маннык тэрээһиннэр эти-сиини чэбдигирдэн, доруобай, чөл буолууга олук уураллар. Бу курдук күнүн аайы бииргэ түмсэн, хамсаныаҕыҥ, эрчиллиэҕиҥ, доруобуйабытын бөҕөргөтүөҕүҥ!
Валентина Кривошапкина, Харбалаах, Таатта
Кэскил14.ру