Тыа хаһаайыстыбатын иһитиннэрэр-ырытар биир кэлим тиһигэр улуустардааҕы тыа хаһаайыстыбатын салалталарыттан киирэр суһал дааннайдарынан, от ыйын 9 күнүнээҕи туругунан, 64 гектар иэннээх сир охсуллубут уонна 51 туонна от кэбиһиллибит.
Куорунай улууһа көхтөөхтүк туруммута көстөр. Манна 809 отчут 358 тыраахтар көлөлөөх 436 звенону тэринэн (мэхэньисээссийэлээҕэ – 127, ситэтэ суох сэбилэниилээҕэ – 181, илиинэн оттооччута – 128) таҕыста. Билиҥҥитэ охсууларын дааннайа суох. Улуус былаана – 10 532 туонна от.
Амма улууһа 31 тыһ. туонна оту, 2 тыһ. туонна сиилэһи, 1 588 туонна сенаһы бэлэмниир соруктаах. Отчуоттанар кэмҥэ ходуһаҕа 31 киһи 14 звенонан (мэхэньисээссийэлээҕэ – 3, ситэритэ суоҕа – 11) 50 гектары охсубут, 37 туонна оту кэбиспит. Ааспыт сайын эмиэ аммалар бастакынан күүскэ саҕалаабыттара.
Бүлүү улууһуттан 14 гектар охсуулаахтарын, 14 туонна кэбиһиилээхтэрин иһитиннэрбиттэр. Ходуһаҕа 26 отчут 7 звенонан 2 тыраахтардаах үлэлии сылдьар. Өрөспүүбүлүкэҕэ саамай элбэх улахан тэриллиилээх хаһаайыстыбалаах улуус бүгүҥҥүттэн күргүөмүнэн турунуоҕа.
Санатыстахха, иллэрээ сайын оттоммуттан 16 906 туонна кур от ордон (01.06.2025 туругунан), элбэх хаһаайыстыба кыстыгы холкутук туораатаҕа. Былырыыҥҥы быйаҥтан икки бүк элбэх от курулаабытын сыыппара кэпсиир. Ол курдук, сүөһү-сылгы кыстыгын түмүктүүр бүтэһик дааннайынан (28.05.2026) 32 496 туонна от (сайын оттоммуттан 7,55 бырыһыана), 2 494 туонна сиилэс, 573 туонна сенаж ордубуттар. Чурапчыга уонна Мэҥэ Хаҥаласка 5 930-чалыы, Өлүөхүмэҕэ 3, Хаҥаласка, Намҥа 2, Аммаҕа, Үөһээ Бүлүүгэ, Уус Алдаҥҥа, Бүлүүгэ, Кэбээйигэ 1 тыһыынчаттан тахсалыы туонна от хаһаастаахтар.
Источник: https://ulus.media/2026/07/10/ot-%d2%aflete-bastakynan-amma%d2%95a-uonna-b%d2%afl%d2%af%d2%afge-kebi%d2%bbiiler-turdular/