Быйыл Сунтаардааҕы политехническай лиссиэй-интэринээти 59 оҕо бүтэрэн олох киэҥ аартыгар үктэннибит. Биир кэлим эксээмэннэрбитин ситиһиилээхтик туттаран оскуолабытын, учууталларбытын кытары быраһаайдаһар үтүө киэһэбитин эмиэ да үөрэ, эмиэ да харах уулаах атаардыбыт.
Быйыл лиссиэйбит саҥа дьиэҕэ көһөрүн элбэх оҕо долгуйа күүтэр. Хомойуох иһин, биһиги выпуск саҥа оскуолаҕа үөрэммэтибит. Онуоха лиссиэйбит дириэктэрэ Олег Константинович Сосин быйыл оскуоланы бүтэрэр оҕолору түмэ тардан саҥа лиссиэй дьиэтин көрдөрдө. Саҥа лиссиэй дьиэтэ оҕо үөрэнэригэр, билиини ыларыгар бары өттүнэн табыгастаахтык оҥоһуллубут. Киэҥ-куоҥ, сырдык кылаастар саҥа үөрэнээччилэри күүтэллэр. Оҕо үөрэх кэнниттэн сынньанарыгар анаан араас зоналар, икки спортивнай саала, улахан аактабай саала, киэҥ-куоҥ бибилэтиэкэ, аһыыр сир – бу барыта саҥа лиссиэйгэ баар буолар. Билиҥҥи үөрэнээччилэр урукку курдук хас да сиринэн сылдьан үөрэммэт буолаллар. Сорох оҕолор өссө биир сыл хаалан үөрэниэхтэрин баҕардылар. Оттон биһиги кылаас урукку оскуолабытын син биир күндүтүк саныахпыт. Бу оскуолабытыгар элбэх үөрүүлээх-көтүүлээх түгэннэр буолбуттара.
Быйыл оскуоланы бүтэрээччилэр историческай түгэҥҥэ кыттыыны ыллыбыт. Саҥа лиссиэйгэ выпускниктар аллеяларыгар хатыҥ мастары олортубут. Бу мастарбытын биһиги кэннибититтэн хаалар үөрэнээччилэр үчүгэйдик харыстаан көрүөхтэрэ-харайыахтара. Аны хас эрэ сылынан бу саҥа лиссиэйгэ кылааһынан кэлэн олордубут мастарбыт анныгар хаартыскаҕа хатаныахпыт.
Ирина Афанасьева, Сунтаар