Самаан сайын саңа саҕаланан, оҕолор күүтүүлээх сынньалаҥнара тиийэн кэллэ. Уһун кыһын устата күүппүт кэрэ кэммитин бары араастык былааннаан атаарабыт. Ким эрэ сынньана лааҕырдыыр, ким эрэ оттуур, ким эрэ дьиэтээҕи үлэҕэ көмө буолар, оттон ким эрэ үлэ булунан үлэлиир.
Бөһүөлэкпит туллар тутааҕа — тэрилтэбит — сылгы собуота, сайын аайы улахан кылаас үөрэнээччилэрин үлэҕэ ылар. Ол курдук, бу сайын эмиэ биэс оҕо үлэҕэ киирдэ. Кинилэр номнуо бэс ыйын 18 күнүттэн үлэлэрин саҕалаатылар.
Дьулустаан Кириллов 10 кылааһы бүтэрдэ. Кини үүт астыыр сыахха көмөлөһөөччүнэн үлэлиир. Быйыл саҥа үлэлиир. Сарсыарда 9 чаастан уопсайа түөрт ыанньыксыттан 170 киилэ үүтү тутан, сүөгэйдээн, арыылаан, йогуртаан атыыга таһаараллар. Дьулустаан ааспыт сайыннарга сылгыһыт көмөлөһөөччүтүнэн үлэлиирэ.
Игнат Винокуров 9 кылааһы бүтэрдэ. Игнат ньирэйдьит көмөлөһөөччүтүнэн үлэлиир. Кини быйыл эмиэ саҥа үлэлиир. 40-ча ньирэйи көрөллөр. Тэлликтэрин уларытан, сиэбит отторун тобоҕун ыраастаан, үүт сыаҕыттан эриллибит үүтү (обрат) илдьэн аһаталлар. Игнат үлэтин сөбүлээбит, эһиил да үлэлии киириэм диир.
Спира Винокуров 10 кылааһы бүтэрдэ. Спира төрөппүттэрин кытта Чоҥкуйа учаастагар оттуу барарга былааннанар. Кини былырыын эмиэ оттообута, ол иннинэ сылгыһыт көмөлөһөөччүтүнэн Чоҥкуйаҕа хас да сыл сайылаабыта, онон Чоңкуйа учаастага дойдута да диэххэ сөп.
Оҕолор сайыннарын туһалаахтык атаараллара хайҕаллаах. Оҕо саастарыттан үлэҕэ үөрэнэллэр, харчы өлөрөн дьиэ кэргэн үбүн хаҥаталлар.
Эля Сухомясова, 10 кылаас,
Өлөөкө-Күөл, Орто Халыма