Оҕо көмүскэлин күнүгэр Дьокуускай куоракка Ф.И. Авдеева аатынан Оҕо айымньытын дыбарыаһыгар “Кэрэни киистэнэн дьүһүйүү” диэн Лилия Шарина-Чөмчүүк кинигэтин сүрэхтэниитэ буолан ааста.
Тэрээһини Дьокуускай куорат бибилэтиэкэлэрин ситимин 15 №-дээх филиала “Моя библиотека” оҕо бибилэтиэкэтин үлэһитэ Мария Сивцева салайан ыытта.
Лилия Дьокуускай куорат 26 №-дээх оскуолатын III «Е» кылааһыгар туйгуннук үөрэнэр. Кини оҕо саадыттан саҕалаан уруһуйдуур. Лилия барытыгар дьоҕурдаах – чинчийэр үлэнэн дьарыктанар, сүүрүк, чабырҕахсыт.
Бастакы кинигэтин сүрэхтиир дьоро күнүн саҕаланар бэлиэтин – аалай кыһыл лиэнтэни учууталын Татьяна Петровна Санникованы, кэрэ эйгэтигэр сирдиир уһуйааччытын Светлана Григорьевна Степанованы кытта быста.
Лилия Оҕо айымньытын дыбарыаһын иһинэн үлэлиир «Грани творчества» устуудьуйаҕа үһүс сылын ситиһиилээхтик дьарыктанар. Бу күн эдэр уруһуйдьуту Оҕо айымньытын дыбарыаһын дириэктэрэ Татьяна Ивановна Иванова, дыбарыас иһинэн үлэлиир «Айылгы» этно-култуурунай киин сэбиэдиссэйэ Лина Семеновна Яковлева эҕэрдэлээтилэр.
Кинилэр иитиллээччилэригэр истиҥник махтаннылар уонна Лилия дыбарыас аатын куорат, өрөспүүбүлүкэ, Арассыыйа таһымыгар көмүскүүр тарбахха баттанар дьоҕурдаах оҕо буоларын бэлиэтээн эттилэр. Оҕо айымньытын дыбарыаһыгар сыл устата 10 тыһ. тахса оҕо дьарыктанарыттан «Айылгы» этно-култуурунай кииҥҥэ 2000-тан тахса оҕо 21 куруһуокка сылдьан, дьоҕурун, сатабылын сайыннарар. Быйыл 2 оҕо персональнай быыстапката, 1 оҕо сольнай кэнсиэрэ буолбут. Эһиилги үөрэх дьылыгар 6 оҕо персональнай быыстапката былааннанар.
Бу маннык киэҥ хабааннаах үлэ төрөппүттэр өттүлэриттэн көмөтө суох ыытыллыбат. Онон Лилия төрөппүттэрэ Василена Валериевна уонна Василий Михайлович Шариннар оҕо эргиччи сайдыытыгар оскуоланы, эбии үөрэхтээһин тэрилтэтин, учууталы, уһуйааччыны кытта өйдөһөн, уопсай тылы булан, биир хамаанда буолан үлэлиир холобурун көрдөрөллөр.
Лилия Чөмчүүк бастакы кинигэтин Ю.А. Гагарин аатынан өрөспүүбүлүкэтээҕи типография бэчээттээн таһаарда. Эдэр худуоһунньук уруһуйдара 5 түһүмэҕинэн – «Айылҕаны дьүһүйүү», «Кыыл-сүөл. Көтөр-сүүрэр», «Дьону ойуулааһын», «Аптаах-алыптаах Саҥа дьыл», «Араас композициялар» – таҥыллан киирбиттэр. Лилия бэйэтэ бэлиэтээн эппитин курдук, кинигэҕэ 84 талыллыбыт бастыҥ уруһуйдарын киллэрбит.
20-тэн тахса сыл оҕолору киистэ нөҥүө кэрэ эйгэтигэр сирдиир Лилия уһуйааччыта Светлана Григорьевна илиитин нөҥүө сыл аайы 100-тэн оҕо ааһар. Кини Лилия курдук дьаныардаах үлэһит оҕоҕо түбэспитин бэйэтин дьолунан ааҕар.
Бу күн аҥардас эҕэрдэ тылынан эрэ муҥурдаммата. Лилия бастакы кэрэ түһүлгэтэ ситимниир күүһүнэн уратылаах буолла. Биир саамай чаҕылхай выпускниктарын эҕэрдэлии «Якутяночка» оҕо саадыттан «Дьэдьэннэр» бөлөх оҕолоро, иитээччитэ Ньургустана Гаврильевна Максимова, Лилия оҕо саадыгар бииргэ сылдьыбыт оҕолоро кэлбиттэр. Оҕо саадыгар бииргэ сылдьыбыт дьүөгэтэ Юлия Кириллова «Сырдык санаа« ырыаны бэлэх уунна.
Быраата Вася Шарин доҕотторун кытта «Күндү күлүм» коллекцияны (салайааччы Диана Болеславовна Спиридонова), «Дьэдьэннэр» муода бөлөх, «Якутяночка« оҕо саадын оҕолоро уонна быйылгы выпускниктара (салайааччы Ньургустана Гаврильевна Максимова) көрдөрдүлэр.
26 №-дээх оскуолаҕа бииргэ үөрэнэр доҕотторо, учуутала Татьяна Петровна Санникова Лилияны эҕэрдэлээн туран, «Солнечный круг» ырыаны бэлэхтээтилэр.
«Кэрэни киистэнэн дьүһүйүү» кинигэ ааптарын анаан-минээн эҕэрдэлии ийэтин уонна аҕатын өттүттэн аймахтара Табунановтар, Шариннар, Скрябиннар кэлбиттэр.
– Биһиги балтыбыт аҕабыт Валерий Табунановы удьуордаан, кини аатын ааттата сылдьарын көрөммүт олус үөрэбит, махтанабыт – диэн этэн туран, Петр Валерьевич Табунанов аймахтар ааттарыттан стипендия туттарда.
Эдэр уруһуйдьут кинигэтин сүрэхтэниитинэн Дьокуускай куорат историятын музейын дириэктэрэ Александр Павлович Ноговицын, дьахталлар сойуустарын өрөспүүбүлүкэтээҕи коордианатора Светлана Гаврильевна Ефимова, «Азбука» канцелярскай табаар маҕаһыыныттан Тунаара Виссарионовна Семенова эҕэрдэлээтилэр. Маны таһынан «Барҕарыы» фонда, национальнай художественнай музей, «Үрдэл» хартыына галереята, «Дети-Азии» аан дойдутааҕы фонда, «Канцпроф» маҕаһыын, «Чохоон» ханаал эҕэрдэ суурктарын, бэлэхтэрин ыыппыттарын үөрүүлээх быһыыга-майгыга туттардылар.
«Дети-Азии» аан дойдутааҕы фонда Лилия Шаринаны кытта бииргэ үлэлииргэ контракт баттаспыттар. Мантан ыла кини уруһуйдара «Дети-Азии» фонда араас тэрээһиннэрин киэргэтиэҕэ. Онон эдэр уруһуйдьут эппиэтинэһэ өссө үрдээбит, үлэтэ өссө элбээбит.
Бу күн Лилия Чөмчүүк кырдьык да чөмчүүк таастыы күлүмүрдээтэ. Ийэтигэр, аҕатыгар, учууталларыгар, уһуйааччыларыгар, иитээччилэригэр, доҕотторугар истиҥ махталын биллэрдэ. Кэлбит ыалдьыттар бу бэлиэ күн үйэлээх өйдөбүл буоллун, бары көмөлөөн биир хартыынаны уруһуйдаатылар.
Талааннаах уруһуйдьут оҕобут Лилия бары өттүттэн көмүскэллээх, харысхаллаах буоллун! Ойуулуур-дьүһүннүүр дьоҕура өссө сайдан иһэригэр киэҥ аартыктар арылла турдуннар!
Сардаана МАТВЕЕВА
кэскил14.ру