Бүгүн, ыам ыйын 25 күнүгэр, Саха тыйаатырыгар Оһуохай күнүгэр аналлаах мунньах буолан ааста. 2023 сыллаахха Ил Дархан уурааҕынан бу күнү Оһуохай күнүнэн ылыммыттара.
Бу күн оһуохайдьыттары, оһуохай тула үлэлии-хамсыы, сүүрэ-көтө сылдьар дьону кытта СӨ Бырабыытыластыбатын Бэрэссэдээтэлин солбуйааччы Сергей Васильевич Местников, СӨ Култуураҕа уонна духуобунай сайдыыга миниистирэ Афанасий Иванович Ноев уонна «Оһуохай» Саха өрөспүүбүлүкэтин уопсастыбаннай тэрилтэ бэрэссэдээтэлэ Александр Джурович Данилов көрүстүлэр.
СӨ Бырабыытыластыбатын Бэрэссэдээтэлин солбуйааччы Сергей Васильевич Местников бэлиэ күнүнэн эҕэрдэлээтэ:
Өрөспүүбүлүкэбитигэр Оһуохайга судаарыстыба таһымыгар болҕомто ууруллар буолбута биллэ улаатта. Ил Дархан өйөбүлүнэн, бу күнү үһүс сылбытын бэлиэтиибит. Бу бэлиэ күн оһуохай сайдыытыгар төһүү күүс буолла. Ол курдук, араас тэрээһиннэр ыытыллаллар: өрөспүүбүлүкэтээҕи таһымнаах, улуустарга уонна улуус кииннэригэр буолаллар. Онон бу ылыныллыбыт ыйаах суолтата киэҥ.
СӨ Бырабыытыластыбатын Бэрэссэдээтэлин солбуйааччы Сергей Васильевич Местников «Махтал суруктара» туттарылыннылар: СӨ Дархан этээччитигэр Марфа Тимофеевна Николаеваҕа, «Оһуохай» уопсастыбаннай тэрилтэ чилиэнигэр Елизавета Васильевна Макароваҕа уонна Сибэкки Заровняеваҕа.
СӨ Култуураҕа уонна духуобунай сайдыыга миниистирэ Афанасий Иванович Ноев бэйэтин санаатын эттэ:
Барыгытын Оһуохай күнүнэн эҕэрдэлээтэҕим буолуохтун! Алгыс, олоҥхо, оһуохай — бу биһиги философиябыт, итэҕэлбит. Бу биһиги чыпчаалбыт. Ону Бырабыытыластыба өйүүрэ, өйдүүрэ биһигини үөрдэр уонна кынаттыыр. Бу Бырабыытыластыба ураты болҕомтото буолар. Билигин бары киэн тутта кэпсиэхтээхпит, оhуохай — сиэр-майгы төрдө буолар. Хас эмэ сылынан эт тылбытынан, санаабытынан бу норуокка туһалаах диэн, оһуохайы өрө тутан, хаалларар уонна тиэрдэр соруктаахпыт.
Бүгүн, Оһуохай күнүгэр, «СӨ култуураҕа туйгуна» үрдүк ааттар иҥэрилиннилэр: Мария Ивановна Ивановаҕа, Вера Захаровна Макароваҕа. Ону таһынан «Оһуохайы үйэтитиигэ үтүө суобастаах үлэтин иһин» бочуотунай наҕараада Арчыһыт Айыы Уолана Алааска туттарылынна. Бочуоттаах наҕараада Үтүөлээх этээччигэ Кырджаана Николаевна Евсееваҕа, «Махтал сурук» Үтүөлээх этээччигэ Аграфена Семеновна Герасимоваҕа, Кристина Аввакумовна Кузьминаҕа, «Норуот уус-уран айымньытын — Оһуохай сайдыытыгар тус кылаатын иһин» махтал сурук Үтүөлээх этээччигэ Петр Семенович Григорьевка туттарылыннылар.
Бүгүҥҥү түмсүүгэ Оһуохай инники суолун, дьылҕатын тобулар суоллары быһаарыстылар, туох тиийбэтин-наадатын ырытыстылар, кэлэр кэнчээри ыччакка хайдах тиэрдэр туһунан кэпсэтиилэр бардылар.
Үгүс үйэлэр арҕастарын туораабыт, хаардаах хайалар санныларыгар тайаммыт, күһүҥҥү өскүөҥҥэ көмүллүбэккэ, сааскы халааҥҥа сайҕаммакка аныгы үйэҕэ айаннаан кэлбит, ыра санааны ымыы гыммыт, саха омугу дохсун олох таһымыгар таһаарбыт киэн туттар, кэрэ үгэспит — Оһуохай!