Сахабыт сирин кырачаан талааннара аан дойду таһымыгар өссө биир үрдүк чыпчаалы дабайдылар! Ол курдук, 2026 сыл ыам ыйын 2–5 күннэригэр Казахстан киин куоратыгар Астанаҕа буолан ааспыт VII норуоттар икки ардыларынааҕы «British Grand Festival» искусство бэстибээлигэр «Бриллианты Якутии» оҕо театра чаҕылхай кыайыыны ситиһэн, Сахабыт сирин аатын ааттатта.
Айар кут аргыстара буолбут үрдүк ситиһии — бу театр олохтоммут күнүттэн бииргэ үлэлээн кэлбит идэтийбит салайааччылар сыралаах үлэлэрин түмүгэ. Кинилэр хас биирдии оҕо иһигэр баар кыракый «күлүмү» арыйан, дьиҥнээх сыаналаах бриллиаҥҥа кубулутар ураты айар куттаахтар:
— Афанасий Афанасьевич Соловьев — ансаамбыл салайааччыта, РФ уонна СӨ үтүөлээх артыыһа. Кини туруорбут үҥкүүлэрэ ураты драмалаах сюжеттарынан уонна дириҥ ис хоһооннорунан дьүүллүүр сүбэни сөхтөрдүлэр.
— Зоя Михайловна Соловьева — ансаамбыл салайааччыта, СӨ үтүөлээх артыыһа. Зоя Михайловна оҕолорго үҥкүү нарын-намчы хамсаныыларын иҥэрэр уонна ансаамбыл ис иллээх туругун тутан олорор сүрүн киһи буолар.
— Айталина Михайловна Унарова — ансаамбыл хореограба, кырачааннар бөлөхтөрүн салайааччыта. Кини Астанаҕа бэлэмнээн илдьибит нүөмэрдэрэ биир да миэстэни атын дойдуларга биэрбэккэ, Гран-при үрдүк таһымыгар тиэртилэр.
ГРАН-ПРИ — Үрдүкү наҕараада: Уол оҕолор эрчимнээх, күүстээх тыыннаах «Чохчоохой» үҥкүүлэрэ;
I СТЕПЕННЭЭХ ЛАУРЕАТТАР: «Дьэрэкээн оһуордар» — сахалыы төрүт үгэһи аныгылыы стильгэ дьүөрэлээбит көстүүмнээх саха чаҕылхай үҥкүүтэ. «Күлээрий» — кыргыттар холбоһуктаах бөлөхтөрүн оҕо саас сырдык эниэргийэтин арыйар. «Полярные звездочки»— Эрик уонна Аиша дуэттара көрөөччүлэри нарын хамсаныыларынан абылаатылар;
II СТЕПЕННЭЭХ ЛАУРЕАТТАР: «Якутские куклы» («Божьи коровки» бөлөх) үҥкүү кустук араас өҥүнэн оонньуур мааны көстүүмнэрэ уонна кыргыттар остуоруйа кууклаларын курдук нарын хамсаныылара Астана сыанатын дьиҥнээхтик киэргэттилэр. «Гусарский танец» (Артур Сивцев солота), бэйэтин талаанын чаҕылхайдык көрдөрдө.
Үгүс оҕоҕо бу аан бастакы тас дойдуга гастроллара буолан, олус долгутуулаах уонна умнуллубат түгэнинэн буолла. Хас биирдии нүөмэр — бу дьиҥнээх уус-уран айымньы. Оҕолор таҥастара-саптара ураты оһуорунан, саҥалыы тыыннаах тиһиллэн, Астана сыанатын киэргэттилэр. Биллэн туран, хас биирдии кыайыы кэннигэр төрөппүт истиҥ өйөбүлэ, итэҕэлэ уонна салайааччылары кытта биир сыаллаах-соруктаах үлэтэ турар. Оҕолорбутун иннигэр өссө да үрдүк чыпчааллар, саҥа ситиһиилэр күүтэллэр!
Кэскил14.ру