Бу күннэргэ Н.Е. Мординов-Амма Аччыгыйын аатынан үөрэхтээһин холбоһугун оскуола салаатын үөрэнээччилэрэ Улуу Кыайыы 81 сылын көрсө үлэ-хамнас ортотугар олох бокуойа суох сылдьаллар.
Бастатан туран, сыһыарыылаах бэтэрээннэригэр тиийэн көрсөн, кэпсэтэн, бэлэх туттардылар.
«Бастыҥнар хамсааһыннара» тэрийэр акцияларыгар кыттан, ыаллары кэрийэ сылдьан георгиевскай лиэнтэлэри бэлэхтээтилэр, «Кыайыы түннүктэрэ» акцияҕа кыттан, кылаастарын, оскуолаларын түннүктэрин киэргэттилэр, Аҕа дойду сэриитин туһунан киинэлэри көрөн ырытыстылар. Ини-бии Мординовтар түмэл сэбиэдиссэйэ С.А. Васильева киэн туттар буойун-бэтэрээммит Иннокентий Егорович Дайбанныров төрөөбүтэ 105 сылынан түмэл уруоктарын ыытта. Онно Иннокентий Егорович сиэннэрэ көхтөөхтүк кыттан, эһэлэрин туһунан доҕотторугар кэпсээтилэр.
Бэҕэһээ үөрэх кэннэ дэриэбинэни ыраастыыр субуотунньук тэрийэн, үлэ-хамнас бөҕө буоллулар.
Бүгүн оскуолаҕа «Сүгүрүйүү түһүлгэтэ» тэрээһин ыытыллыахтаах. Онно эмиэ хас биирдии кылаас анал сорудахтаах.
Онон Харбалаах үүнэр көлүөнэ ыччата Кыайыы күнүн көрсөргө бэлэм. Маннык тэрээһиннэр оҕо-аймаҕы Кыайыы күнүн суолтатын толору өйдүүргэ, төрөөбүт дойдуга бэриниилээх буоларга иитэр тускуллаахтар.
Валентина Кривошапкина, Харбалаах.
Кэскил14.ру