Муус устар 29 күнүгэр Нам улууһугар З.А. Тихонова аатынан «Түөлбэ» оҕо киинин көҕүлээһининэн «Эркээйи эргиирэ» бырагырааманан «Нам улууһун үөрэҕин ситимигэр үлэ ис хоһооно, инники соруктара» диэн ааттаах өрөспүүбүлүкэ таһымнаах мэтэдиичэскэй сэминээр ыытылынна.
Нам улууһугар аҕа баһылык уурааҕынан 2019 сылтан саҕалаан төрөөбүт тылынан ыччат сайдар эйгэтин тэрийэр аналлаах кэнсиэпсийэ ылыллан, салгыы ситэриллэн 2024-2026 сылларга былааннаах үлэ ыытыллар. Инньэ гынан, «Эркээйи эргиирэ» бырагырааманы кэнсиэпсийэни олоххо киллэрэр сүрүн ньыма быһыытынан сыаналыыбыт. Онон намнар бырагыраама сэһэнигэр кэлимсэ киирэргэ улахан интэриэстээхпит.
Мэтэдиичэскэй сэминээргэ «Эркээйи эргиирэ» бырагыраамаҕа олоҕуран улуус үөрэҕин тэрилтэлэрин үлэтин тупсарыы уонна саҥа таһымҥа таһаарыы туһунан кэпсэтии, ырытыһыы буолла. Бу күн үөрэх бары тэрилтэлэрин салайааччылара, оҕону иитиинэн дьарыктанар бары араҥа үлэһиттэрэ, Намнааҕы педкэллиэстэн уонна техникумтан бэрэстэбиитэллэр ыҥырыллан, уопсайа 60 киһи хабыллан үлэлээтэ.
Сэминээр үрдүк тэрээһиннээхтик уонна дириҥ ис хоһоонноохтук ыытылларыгар «Эркээйи эргиирэ» бырагырааманы олоххо киллэрии боппуруостарыгар СӨ үөрэҕин уонна наукатын министиэристибэтин оробуочай бөлөҕүн сүрүннээччи Геннадий Охлопков улахан болҕомтону уурда.Бэйэтэ ылсан тэрээһини иилээн-саҕалаан уонна тэрийсэн үлэлэспитэ төһүү күүс буолла. Кини ыҥырыытынан сэминээргэ «Эркээйи эргиирэ» бырагыраама ааптардара, сүрүннэһэ сылдьар тэрилтэлэр бэрэстэбиитэллэрэ кэлэн кыттыбыттара, баҕа санааларын тиэрдибиттэрэ, уопуттарын үллэстибиттэрэ, итиэннэ үөрэх тэрилтэлэрин үлэлэрин истэн баран сүбэ-ама биэрбиттэрэ тэрээһиммит ис хоһоонун дириҥэттэ, истээччилэр болҕомтолорун тарта. Ол курдук, Татьяна Ильина – СӨ үөрэхтээһинин үтүөлээх үлэһитэ, айар бөлөх салайааччыта, Екатерина Чехордуна – СӨ үтүөлээх учуутала, педагогикаҕа наука кандидата, Прасковья Петрова – Дьокуускай куорат «Айыы Кыһата» национальнай гимназия алын сүһүөх кылаас учуутала, Сардаана Матвеева – оҕолорго аналлаах «Кэскил», «Чуораанчык», «Бэлэм буол» сахалыы таһаарыылар сүрүннүүр эрэдээктэрэ кытыннылар.
Тэриллибит быыстапка, ыытыллыбыт маастар-кылаастар уонна педагогтар, биэбэйик иитээччилэрэ бэйэлэрин үлэлэрин сырдаппыттарыгар олоҕурдахха, Нам улууһун үөрэҕин ситимигэр «Эркээйи эргиирэ» бырагырааманан оҕо сайдар эйгэтин тэрийэргэ сөптөөх үлэ ыытыллыбыт. Ол эрээри, бырагыраама ис хоһоонунан салгыы дириҥиир: бэйэ үлэтигэр саҥа сыһыаны олохтуур, ол аата, ыытыллар тэрээһиннэри ырытан, саҥа суоллары тобулар, айымньылаах үлэнэн байытар уонна тупсарар, үүнэр көлүөнэни иитиигэ тирээн турар кыһалҕалары туоратар соруктар тураллара бэлиэтэннэ. Маны таһынан улууска«Эркээйи эргиирэ» бырагыраама оҕону сайыннарыыга сүрүн тосхол буолан олоххо киирэрин ситиһии бары өттүттэн этилиннэ уонна өйөннө. ‟Эркээйи эргиирэ” бырагыраама Нам улууһугар үөрэх тэрилтэтэ, пилотнай былаһаакка буоларыттан, буолбатыттан тутулуга суох, биир кэлимник ылсан дьоһуннаахтык үлэлээн саҥа таһымҥа тахсара сүрүн түмүк быһыытынан этилиннэ.
Түгэнинэн туһанан, сэминээри тэрийиигэ көмөлөрүн иһин С.Н.Донской-II аатынан үөрэҕи сайыннарар уонна идэ таһымын үрдэтэр институтка, СӨ оҕолорун уопсастыбаннай холбоһуктарын сойууһугар, Нам улууһун үөрэҕириитин салалтатыгар, итиэннэ З.А.Тихонова аатынан «Түөлбэ» оҕо Киинин педагогическэй кэлэктиибигэр махталбытын тиэрдэбит.
Мария Никитина,
Нам улууһун З.А. Тихонова аатынан
«Түөлбэ» оҕо киинин мэтэдьииһэ.
Кэскил14.ру