«Володя Ульянов дневнигэ» Бочуот дуоскатын «Бэлэм буол» («Кэскил») хаһыакка 50-тан тахса сыл редакторынан үлэлээбит Нина Иннокентьевна Протопопова толкуйдаан оҥорбут. Кини В.И.Ленин төрөөбүтэ 100 сылын көрсө оҕолору көҕүлүүргэ хаһыакка бу балаһаны киллэриэххэ диэн этии киллэрбит. Ону норуот суруйааччыта Н.Е.Мординов-Амма Аччыгыйа «Союз үрдүнэн ким даҕаны төбөтүгэр кэлбэтэх суол» диэн хойукка диэри хайгыыр эбит.
Ол курдук, 1980 с. ыам ыйын 11 күнүнээҕи нүөмэригэр «Володя Ульянов дневнигэр» Горнай улууһун Бэрдьигэстээх орто оскуолатын V «А» кылааһын туйгун үөрэнээччитэ Оксана Павлова тахсыбыт. Биһиги Оксананы булан кэпсэттибит, санаатын иһиттибит. Билигин Оксана Платоновна Хурда — начаалынай кылаас учуутала, СӨ үөрэҕириитин туйгуна, РФ үөрэҕириитин бочуоттах үлэһитэ, үлэ бэтэрээнэ.
Мин Бэрдьигэстээх Семен Данилов аатынан орто оскуолаҕа бастакы кылаастан туйгуннук үөрэммитим. Маҥнайгы убаастыыр, таптыыр учууталым Александра Егоровна Кузьмина ааҕарга-суруйарга үөрэппитэ, билиигэ-көрүүгэ угуйбута. Начаалынай кылааска үөрэнэ сылдьан кылааспытыгар 5 туйгун үөрэнээччи баар этибит. Учууталбыт биһигини элбэххэ үөрэппитэ. Ол курдук туох баар оскуолаҕа ыытыллар тэрээһиннэргэ кыттарга көҕүлүүрэ, мөлтөхтүк үөрэнэр табаарыстарбытыгар көмөлөһүннэрэр этэ, переменаҕа тэтэрээт да бэрэбиэркэлэтэрэ. Кэнники даҕаны, 5-с кылааска тахсан баран, учууталбыт саҥа оҕолоругар вожатайдыыр этибит. Баҕар ол да иһин буолуо, оччолортон оҕолору үөрэтэрбин сөбүлээн, бу 35 сыл тухары учууталбын утумнаан, бэйэм начаалынай кылаас учууталынан үлэлиибин. Оскуолаҕа үөрэнэ сылдьар кэммитигэр үөрэнээччилэр «Бэлэм буол » хаһыаты суруттаран сөбүлээн ааҕар этибит. Араас сонуннар, бэйэбит саастыылаахтарбыт заметкалара, аан дойду да туһунан араас информация баар буолара. Бэйэбит сонуннарбытын хаһыакка эдэр кэрэспэдьиэн быһыытынан суруйан ыытарбыт. Онтубут хаһыакка бэчээттэннэҕинэ олус үөрэрбит. Ол саҕана «Бэлэм буол» хаһыакка туйгун үөрэнээччилэр Володя Ульянов дневнигэр, хаһыат саамай инники балаһатыгар нүөмэр аайы хаартыскалара тахсар этэ. Биһиги кылаастан бу балаһаҕа 4 буолан 5-с кылааска үөрэнэ сылдьан бэчээттэммиппит. Хаһыакка хаартыскабыт тахсан үөрэн тутум үрдээбиккэ дылы буолбуппутун өйдүүбүн. «Володя Ульянов дневнигэр» туйгун үөрэхтээх, үчүгэй бэрээдэктээх, оскуола олоҕор көхтөөхтүк кыттар, ситиһиилээх үөрэнээччилэри таһаараллара. Бу дневниккэ тахсыы улахан чиэс уонна эппиэтинэс этэ. Оскуола оҕолоро, учууталлар бары ааҕар хаһыаттарыгар тахсар чиэс-бочуот бөҕө буоллаҕа дии. Бу дневниккэ тахсыбыт оҕолор кэнники даҕаны ааппытын түһэн биэрбэккэ, оскуоланы бүтэриэхпитигэр диэри туйгуннук үөрэммиппит. Ол саҕана мин олус актыыбынай октябренок, пионер, комсомол чилиэнэ этим. Оскуолаҕа дружина сэбиэтигэр, комсомол сэбиэтигэр баарым. Даниловскай ааҕыыларга хоһоон ааҕан, кэнсиэрдэргэ үҥкүүлээн, выставкаларга иистэнэн элбэх тэрээһиҥҥэ кырабыттан кыттар этим. Ону таһынан араас олимпиадаларга кыттан, оскуола, улуус да чиэһин көмүскээбитим. Саамай туйгун үөрэнээччилэр Артек, Орленок лааҕырдарга баран сынньанан, муораҕа сөтүөлээн кэлэр этилэр. Ол гынан баран олох биир эмэ үөрэнээччи маннык чиэскэ тиксээччи. Хомойуох иһин, биһиги бу чиэскэ тиксибэтэхпит. Оскуоланы туйгуннук үөрэнэн бүтэрбитим. Ол саҕана кыһыл көмүс мэтээл оскуолаҕа биир эрэ үөрэнээччигэ бэриллэр этэ. Биһиги бүтэрэр сылбытыгар кыһыл көмүс мэтээли Женя Маркова ылары ситиспитэ. Үрүҥ көмүс мэтээл диэн ол саҕана суох этэ. Биһиги кэннибититтэн бүтэрбиттэр ылбыттара. Оскуола кэнниттэн М.К. Аммосов аатынан Государственнай университекка киирэн педагогическай факультеты бүтэрэн, күн бүгүнүгэр диэри төрөөбүт улууспар начаалынай кылаас учууталынан үлэлии сылдьабын. 9 выпусктаахпын.
Оксана Платоновнаҕа уонна ол саҕанааҕы оҕолорго — барыларыгар «Володя Ульянов дневнигэр» тахсыы, кырдьык, чиэс-бочуот уонна улахан суолта этэ. Ити кинилэри кынаттыыра, санааларын бөҕүргэтэрэ, эппиэтинэс биэрэрэ. В.И. Ленин дневнигэр тахсыбыт оҕолор билигин ситиһиилээх, эппиэтинэстээх, чиэһинэй уонна үлэһит дьон буола сылдьалларыттан үөрэбит.
«Сайдам» медиа-киин эдэр кэрэспэдьиэннэрэ, Бэрдьигэстээх, Горнай