«Бэлэм буол» уонна Уйбаан Ороһуунускай» диэн тэрээһини бэһис кылааска үөрэнэр «Иэйиэхсит» оҕо бөлөҕөр сылдьар оҕолор иилээн-саҕалаан ыыттылар.
Тэрээһини арыйда Айсаана Павлова саҕалаата: «Поэт суруйааччы, кыраайы үөрэтээччи, топономист, Арассыыйа географическай уопсастыбатын чилиэнэ, Айылҕа харыстабылын туйгуна, Саха Өрөспүүбүлүкэтин култууратын үтүөлээх үлэһитэ, Үөһээ Бүлүү улууһун, Ороһу нэһилиэгин бочуоттаах олохтооҕо, норуот эмчитэ Иванов Иван Еремеевич-Уйбаан Ороһуунускай оҕо сааһа «Кустук» холхуоска, Дьаархан диэн алааска ааспыта. Кини төрдүс кылааска үөрэнэр сылларыттан хоһоону суруйууга холоммут,ол курдук «Маай» диэн маҥнайгы хоһооно «Бэлэм буол» хаһыакка тахсыбыта.1963 сыллаахха Ваня Иванов көхтөөх юнкор быһыытынан «Бэлэм буол» анал бирииһинэн «Смена»фотоаппаратынан бириэмийэлэнэн турар. Суруйар талааннаах уол өрөспүүбүлүкэтээҕи куонкуруска «Хоннохтоох хотуурдаах уолаттар» диэн ыстатыйанан кыттан, 3 миэстэни ылбыта. «Костёр» сурунаал биллэрбит Бүтүн Союзтааҕы уус-уран айымньы куонкуруһугар «Хаптаҕастыы сылдьан хаптарбыт» диэн кэпсээнинэн кыттан 1 миэстэни ылан, «Орлёнок» лааҕырга баран сынньаммыттаах».
Уйбаан Ороһуунускай оҕо, учууталлыы сылдьан «Бэлэм буол» хаһыакка суруйбут сонуннарын, ыстатыйаларын оҕолор кэпсээтилэр. «Иэйиэхсит» оҕо бөлөҕөр сылдьар оҕолортон иккис кылаас үөрэнээччитэ Наиля Осипова «Эбээ Марыынаҕа көмө», «Камилла Ноговицына «Чыычаах остолобуойа», Туйаара Никонова «Катеры өрүһүйдүлэр», Витя Котоконов «Хара куобах» кэпсээбиттэрин, боппуруостарга эппиэттээбиттэрин истибит оҕолор куоластаан Витя Котоконовка бастакы, Туйаара Никоноваҕа иккис уонна Камилла Ноговицынаҕа, Наиля Осиповаҕа үһүс миэстэлэри биэрдилэр. Бириистэрэ минньигэс буолла.
Сынньалаҥҥа Ваня Иванов оҕо сааһа ааспыт Дьаарханын алааһыгар үүммүт дөлүһүөнүттэн утаҕы саха бастыҥ аһын алаадьыны кытта сиэн астынныбыт. Оҕо саас сүрүн дьарыга оонньуу. Хартыынканан лото, «ойбон», «балыктааһын» курдук оонньууну оонньообуттарын таһынан, бэһис кылаас салайааччыта Люция Петровна Кондакова бэлэмнээн кэлбит таабырыннарын таайдылар. Бу оонньуулар, таабырын таайыытын түмүгүнэн бастаата Витя Котоконов, иккис Миша Лаптев, үһүс Эльвира Яковлева.
Тэрээһин Ороһу нэһилиэгин Уйбаан Ороһуунускай аатынан модельнай библотекатыгар ыытылынна. Ваня Иванов-Уйбаан Ороһуунускай туһунан эбии билбиттэригэр, сонун, бириистээх оонньууну оонньоппуттарыгар «Иэйиэхсит» оҕо бөлөҕүн салайааччытыгар Нина Никитична Михайловаҕа, библиотека сэбиэдиссэйигэр Жанна Семеновна Ивановаҕа уонна Екатерина Константиновна Котоконоваҕа кэлбит оҕолор махтаннылар.
Алина Габышева, «Тымтык» эдэр кэрэспэдьиэннэрин поһа, Үөһээ Бүлүү, Ороһу.
Кэскил14.ру