Муус устар 8-17 күннэригэр «Сосновый Бор» оҕо сынньанар-чэбдигирэр киинигэр «Расскажи о главном» диэн ааттаах анал смена ыытылла турар. Бу кэмҥэ өрөспүүбүлүкэбит араас улууһуттан медиа эйгэҕэ талааннаах, эдэр кэрэспэдьиэн оҕолор муһуннулар. Кинилэр бары биир сыаллаах-соруктаах буолаллар: саҥа билиини иҥэринэн, төрөөбүт дойдуларын туһунан кэпсиир.
Смена саамай күүтүүлээх уонна долгутуулаах түгэнинэн билиҥҥи кэмҥэ биллэр-көстөр блогер, саха дьонун-сэргэтин сүргэтин туппут Анастасия Груздеваны кытта көрсүһүү буолла. Анастасия аан дойдуну тыйыс тымныы айылҕалаах, тымныы чыпчаала дойдунан сөхтөрбүтэ, онтон ыла үс сыл устата төрөөбүт Сахатын сирин кэрийэн, кэрэ айылҕатын туһунан кэпсиир.
Көрсүһүүгэ оҕолор бэйэлэрин интэриэһиргиир ыйытыыларын блогерга биэрдилэр. Мин эмиэ Анастасияны кытта кэпсэтэн, кини хайдах тревел-блогер буолбутун уонна хас улууһу кэрийбитин туһунан ыйыталастым.
— Анастасия, эн хас сыллаахтан Саха сирин кэрийэҕи уонна тоҕо тревел-блогер буоларга быһаарыммыккыный?
— Ордук 2021 сылтан, «ковид» кэмин кэнниттэн айаннаан саҕалаабытым. Саамай бастакы сырыым — Өймөкөөн. Ол сырыым олус табыллан, биир ыйынан эмиэ оннук сырыы суолунан барбытым. Онтон сайыҥҥы айаннар саҕаламмыттара. Ол кэмҥэ чуолаан Илиҥҥи Хаандыга хайаларын арыйбытым. Оччолорго элбэх киһи бу сирдэри билбэт этэ, ол иһин тревел-блогер буоларга санаммытым.
Бу көрсүһүүнү оҕолор олус сөбүлээтилэр, Анастасия кэпсээнин биир тыынынан иһиттилэр. Кинилэр блогеры кытта санаа атастаһан, интэриэстэрин ыйыталаһан, кэпсэтэн, баҕа санааларын тиэртилэр.
Маннык көрсүһүүлэр эдэркээн кэрэспэдьиэннэрбитигэр саҥа күүһү-уоҕу эбэллэр, инники үлэлэригэр улахан өйөбүл буолаллара саарбаҕа суох.
Мусьяна Попова, VIII кылаас,
И.Г. Тимофеев аатынан Майа лиссиэйэ.
кэскил14.ру