Кулун тутар 24-27 күннэригэр XI Аан дойдутааҕы INTERNATIONAL EUROPEAN FESTIVAL ARTS «Germany – Kazakhstan 2026» диэн Казахстаҥҥа ыытыллыбыт күрэххэ Дьокуускай куоратын 17 нүөмэрдээх орто оскуолатыттан икки кылаас баран кытыннылар.
Ол курдук, 3 «в» кылааһын үөрэнээччилэрэ Заровняева Любовь Святославовна кылаас салайааччылаах уонна 5 «г» кылааһын үөрэнээччилэрэ Ильина Алена Александровна кылаас салайааччылаах үрдүк таһымнаахтык кыттан улахан ситиһиилэрдээх тиийэн кэллилэр.
«Тускул» ансаамбыла ( 3 “в” кылаас) сахалыы муоданы көрдөрөн (үҥкүү туруорааччы: Егорова А.И) “ВИП Гран-при” уонна хомуска оонньоон (худ. салайааччы: Жиркова Т.А) 1 истиэпэннээх Лауреат үрдүк аатын ылбыттар. “Үнүгэс» ансаамбыла ( 5 “г” кылаас) хомуска оонньоон (худ.салайааччы: Жиркова Т.А) “Гран-при” уонна сахалыы норуот фольклорун толорууга ( худ.салайааччы: Дмитриева Н.В) 1 истиэпэннээх Лауреат үрдүк аатын ылан үөрбүттэр.
Оскуолабыт эдэр корреспондена Валерия Васильева Заровняева Л.С көрсөн маннык улахан таһымнаах күрэххэ хайдах кыттан кэлбиттэрин туһунан ыйыталаста.
- Любовь Святославовна, кыра кылаас оҕолорун кытта ыраах Казахстаҥҥа баран кыттар хайдах эбитий?
Любовь Святославовна: Биһиги мантан кулун тутар 22 күнүгэр айаннаабыппыт уонна кулун тутар 25 күнүгэр бу Казахстан, Алматы куоракка “Германия Казахстан” диэн проегынан улахан европейскай фестиваль буолла. Онно кылааспыттан 17 оҕо баран кыттан кэллэ. Барарбытыгар оскуолабыт администрацията өйөөн каникул буола илигинэ айаҥҥа туруммуппут. Төрөппүттэрим барытыгар көмөлөһөн бу улахан күрэххэ олус үчүгэйдик кыттан кэллибит.
- Маннык улахан конкурска Гран-при ыларга эһиги санааҕытыгар туох көмөлөстө?
Любовь Святославовна: Бу конкурска сүрдээх элбэх сиртэн кэлбиттэрэ этэ. Казахстантан саамай элбэх кэлэктиип баар, ону таһынан, Россияттан, Киргизияттан, Алтайтан уонна Белоруссияттан кэлэн кыттыбыттара. Оҕолор бары олус талааннаахтар. Онтон биһиги Гран-при буолбуппут диэн , мин санаабар, Сахабыт сирин уратытын, баайын-дуолун, бэлиэ символларын, оҕолорбут таҥас нөҥүө хамсанан-имсэнэн көрдөрбүттэрэ улахан сэҥээриини ылла. Онно жюри даҕаны, көрөөччүлэр даҕаны дойдубут туһунан олус элбэҕи ыллылар дии санаатыбыт.
- Бу тэрээһин кэнниттэн, эһиги санааҕытыгар, оҕолор туохха ордук үөрэннилэр?
Любовь Святославовна: Оҕолор маннык ыраах айаҥҥа араас сири-дойдуну көрөллөр, элбэҕи билэн-көрөн кэлэллэр, үгүскэ үөрэнэллэр, элбэх доҕордоноллор. Инникитин даҕаны бу кыттыбыт оҕолор өссө күүскэ кыһаллан, дьарыктанан, хомуска оонньуулларын чочуйан, өссө да элбэх конкурстарга кыттыахтара дии саныыбын.Любовь Святославовнаҕа кэпсэппитин иһин махтанан туран, оҕолорго, учууталларга, салайааччыларга өссө үрдүктэн үрдүк ситиһиилэр кэлэ туралларыгар баҕара хаалабыт.
Васильева Валерия, 7 «в» кылааһын үөрэнээччитэ, «Сайдын» медиакиин эдкора