Мин аатым Ганя Пахомов. Социалистическай Үлэ Геройа П.И. Яковлев аатынан Амма-Наахара орто оскуолатыгар иккис кылааска үөрэнэбин. Биһиги оскуолабыт Герой Дьуонабыс аатын сүгэриттэн олус киэн туттабыт. Бэйэм кылааһым туһунан кэпсиэхпин баҕарабын.
БиҺиги кылааспытыгар 12-бит: 5 уол уонна 7 кыыс. Учууталбыт аата Пахомова Мария Павловна. Буукубаны үөрэтэн, ааҕа-суруйа, сыыппаралары кытта билсэн суоттуу үөрэммиппит. Үөрэтэр уруоктарбытыгар умсугуйан туран үөрэнэбит, билии ылар туһугар кыһаллабыт. Сыл устата араас күрэхтэргэ, олимпиадаларга, тэрээһиннэргэ кыттабыт, бириистээх миэстэлэргэ тиксэбит. 3 чиэппэр түмүгүнэн кылааспытыгар 3 кыыс туйгуннук, 7 оҕо үчүгэйдик үөрэнэбит.
Онтон иллэҥ кэммитигэр музейга, библиотекаларга, тэрилтэлэргэ, айылҕаҕа сылдьарбытын ордоробут. Манна биһиги сайдабыт, билиибит-көрүүбүт кэҥиир.
Кылааспыт иһинэн араас тиэмэлээх күннэри, бырааһынньыктары тэрийэбит. Оскуола иһинэн ыытыллар тэрээһиннэргэ көхтөөхтүк кыттабыт.
Биһиги олус иллээхпит-эйэлээхпит. Учууталбыт биһигини бэйэ-бэйэбитигэр көмөлөһөргө, улахаттары убаастыырга үөрэтэр. Оскуолаҕа кыһаллан үөрэнэн, улааттахпытына бары тус-туспа идэлээх буолуохпутун баҕарабыт.
Ганя Пахомов, П.И. Яковлев аатынан Амма-Наахара орто оскуолатын
2 кылааһын үөрэнээччитэ, Амма улууһа.
Кэскил14.ру