Доруобуйа харыстабыла – ханнык баҕарар улуус сайдыытын сүрүн көрдөрүүтэ. 2025 сыл түмүгүнэн Мэҥэ Хаҥалас улууһун балыыһаларын уонна ФАП-тарын үлэтин ырытан, биһиги медицинэ хаачыстыбата уонна тиийимтиэтэ хайдах уларыйбытын кэпсэтэн биллибит.
Национальнай бырайыактар уонна инфраструктура
«Доруобуйа» национальнай бырайыагын чэрчитинэн улууспут балыыһаларыгар улахан уларыйыылар буоллулар. Саҥа тэриллэр киирдилэр, участковай балыыһалар тупсарылыннылар, дьону эмтээһин таһыма үрдээтэ. Билигин медицинэ өҥөтө ыраах нэһилиэктэргэ диэри тиийэр буолла.
Диспансеризация – ыарыыны сэрэтии
Ааспыт сыл түмүгүнэн улууска диспансеризацияны ааспыт дьон ахсаана улаатта. Бу бырагыраама көмөтүнэн элбэх киһи ыарыыта бастакы түһүмэҕэр биллэн, эдэттэн эмтэнэр кыахтанна. Ордук сүрэх-тымыр, хаан баттааһына уонна онкологическай ыарыылар эрдэ биллиилэрэ – диспансеризация сүрүн ситиһиитэ.
Кадрдар уонна «Земскэй быраас»
«Земскэй быраас» бырагыраамата улууспутугар эдэр исписэлиистэри тардыыга улахан төһүү буолар. Участковай балыыһаларга кэлбит эдэр быраастар уонна медсиэстэрэлэр нэһилиэнньэ чөл олоҕугар бэйэлэрин кылааттарын киллэрэллэр.
Мобильнай медицинэ уонна ФЛГ
«Мобильнай быраас» бырайыага уонна көһөрүллэр ФЛГ-станция быйыл тыһыынчанан киһини көрдө. Бу – дьон ыарыыта суоҕун эбэтэр баар буоллаҕына, эрдэ көрдөрөргө саамай наадалаах өҥө.
Демография уонна «Активнай уһун үйэ»
Демографическай турук өттүнэн ааспыт сылы кыттатэҥнээтэххэ, улууспутугар төрөөһүн көрдөрүүтэ син мөккүөрдээх да буоллар, үчүгэй туруктаах. Оттон «Активнай уһун үйэ» бырагыраама кырдьаҕастарбыт доруобуйаларын көрүүгэ, тупсарыыга, кинилэри нэһилиэк олоҕор көхтөөхтүк кытыннарыыга улахан оруолу ылар.
Босхо эминэн хааччыйыы
Льготалаах дьону босхо эминэн хааччыйыы федеральнай уонна өрөспүүбүлүкэтээҕи бырагыраамалар чэрчилэринэн толору үлэлиир. Муниципальнай таһымҥа даҕаны эмп тиийимтиэтин кэтээн көрүү бара турар, нэһилиэнньэ эмтээх буолуута кырыымчык боппуруос быһыытынан хаалбат.
Медицинэ уонна спорт
Медицинэ үлэһиттэрэ бэйэлэрэ даҕаны доруобай олох биир сүрүн холобура буолаллар. Участковай балыыһалар уонна ФАП-тар улуус, нэһилиэк иһинэн ыытыллар спортивнай тэрээһиннэргэ медицинэ өттүнэн хааччыйыыга эрэ буолбакка, бэйэлэрэ да хамаанданан кыттыылара дьону-сэргэни доруобай олоххо, чэгиэн турукка уһуйар күүстээх тирэх буолар.
Мэҥэ Хаҥалас улууһун доруобуйа харыстабыла биир сиргэ турбат. Бүгүн биһиги иннибитигэр турар сүрүн сорукпут – доруобуйаны харыстааһыны, ыарыыттан сэрэтэр дьаһаллары уонна эмтээһин хаачыстыбатын өссө да үрдэтии, эдэр исписэлиистэри өйөөһүн уонна хас биирдии киһини медицинэ көмөтүнэн толору хааччыйыы. Доруобуйа – биһиги инникибит, онон бу хайысхаҕа үлэ – саамай наадалаах уонна эппиэтинэстээх үлэ.
Кэпсэтиини сиһилии видеоҕа көрүҥ:
Мусьяна Попова, VIII кылаас,
И.Г. Тимофеев аатынан Майа лиссиэйэ, Мэҥэ Хаҥалас.
Кэскил14.ру