«Земскэй быраас» уонна «Земскэй биэлсэр» бырагыраамаларынан тыа сиригэр исписэлиистэр кэлэллэрэ үксээтэ. Республикабыт Ил Дархана Айсен Сергеевич Николаев этэринэн «Исписэлиис быраастары тыа сиригэр, куорат тииптээх бөһүөлэктэргэ уонна кыра куораттарга ыҥырарга уонна олохсута хаалларарга «Земскэй быраас» уонна «Земскэй биэлсэр» бырагыраамалар көдьүүстээхтэр».
Тыа сиригэр үлэлииргэ соруммут быраастарга биир кэмнээх төлөбүр көрүллэр. Усулуобуйанан биэс сыл үлэлиирэ ирдэнэр. Бүгүн биһиги Хаҥалас улууһун Улахан-Ааннааҕы Иван Семенович Трофимов аатынан быраас амбулаториятыгар 2025 сыллаахха фельдшеринэн үлэлии кэлбит специалиһы Уйгулаана Семеновнана Голикованы кытта кэпсэттибит.
“Мин Нам улууһуттан төрүттээхпин. 2016 сыллаахха Саха-французская лицейи, 2020 сыллаахха Дьокуускайдааҕы медицинскэй колледжы бүтэрбитим. 2021 сылтан бастакы үлэбэр Дьокуускай куораттааҕы 3№-дээх балыыһаҕа фельдшеринэн үлэлии киирбитим. 2025 сылга Хаҥалас улууһун Улахан Ааныгар үлэ миэстэтэ баарын билэн, “Земскэй биэлсэр” бырагырааманан кэлбитим», – диэн кэпсиир эдэр специалист.
Уйгулаана Голикова этэринэн, маннык өйөбүл баар буолан, үгүс ыччат тыа сиригэр үлэлиир буолла. «Медицинэ эйгэтигэр үөрэнэ сылдьар устудьуоннар үчүгэйдик үөрэниҥ, үөрэххитин бүтэрэн, идэҕитинэн таһаарыылаахтык үлэлээҥ. Барыта бэйэҕититтэн тутулуктаах”, – диэн баҕа санаатын эдэр ыччакка этэр кини.
Корреспондент: Ренат Терентьев, оператор: Владислав Громов, 7 кылаас үөрэнээччилэрэ, 2 Малдьаҕар орто оскуолатын “УОТ” медиакиинэ