Олунньу 28 күнүгэр Чурапчытааҕы «Айылгы» норуот айымньытын дьиэтигэр сылын ахсын ыытыллар улуустааҕы «Кэрэчээнэ Куо-2026» куонкурус буолан ааста.
Улахан кылаас кыргыттара, уопсайа 9 кэрэ куо кыттыыны ыллылар. Биһиги оскуолабыт чиэһин 10 кылаас үөрэнээччитэ Аржакова Нарыйа көмүскээтэ. Кыргыттар бары олус нарыннара, кэрэлэрэ, кып-кыраһыабайдара. Хас биирдии түһүмэх ураты тыыннаах, интэриэһинэй, көрөргө астык этэ. Кыргыттар талба талааннара, дьоҕурдара киһини сөхтөрөр. Кыталык курдук кынталдьыйан мааны бэйэлэрэ өссө киэркэйэн үрдүк сыанаҕа тахсан элбэх киһи сүрэҕин сүүйдүлэр. Бииртэн биир чаҕылхай сулус чаҕылыччы тыган киһи хараҕын саатарара.
Биһиги кыыспыт, нап-нарын Нарыйабыт үрдүк таһымнаахтык кыттан 1 вице Кэрэчээнэ-2026 аатын сүктэ. Ону тэҥэ «Көрөөччү биһирэбилэ» анал аат хаһаайката буолбута. Оскуолабыт үөрэнээччилэрэ күүстээх хамаанда тэринэн, кыыстарыгар күүс-көмө, өйөбүл буолан «Бастыҥ ыалдьааччылар» анал аат ыланнар 10 тыһыынча уу харчынан бириис тутан үөрүүбүт өссө үксээбитэ.
Сибэкки курдук, саҥа тыыллан эрэр кыргыттарга маннык тэрээһин ыытыллара олус үчүгэй дии саныыбын. Кыргыттары кэрэҕэ, сырдыкка угуйар, үтүө майгыга иитэр!
Арианна Макарова, С.А.Новгородов аатынан Чурапчы орто оскуолатын 11 кылаас үөрэнээччитэ