Кулун тутар 4 күнүгэр академик Л.В. Киренскэй аатынан Амматааҕы лиссиэйгэ ураты күн буолла. Саха Өрөспүүбүлүкэтин үөрэҕириигэ уонна билимҥэ миниистирэ, Нюргуна Соколова ыалдьыттаата. Көрсүһүү кылгас да кэмҥэ буоллар үрдүк таһымнаахтык, барыта былааннаммытын курдук ааста.
Бастаан оскуолабыт мастерскойугар Павел Колесов салайааччылаах «Беспилотные авиационные системы» диэн национальнай бырайыак оскуола иһинэн хайдах үлэлии турарын сырдаттылар. «Юнармейскай килбиэн» III истиэпэннээх мэтээллэринэн наҕараадаламмыт, лётчик-космонавт В.Ф. Быковскай аатынан юнармейскай этэрээт чилиэннэрин оскуолабыт биир бастыҥ үөрэнээччитэ Уваров Влад билсиһиннэрдэ.
Маны тэҥэ сахалартан бастакы космонавы иитэн таһаарар сыаллаах «Старт в космос» диэн бырайыагы сиһилии кэпсээтилэр. Онтон 9 кылаас үөрэнээччитэ Өркөн Солдатов бэйэтин баҕатынан мунньубут кэллиэксийэтин сырдатта. Манна кини хос эһэтин, эбэтин тустарынан сиһилии кэпсээтэ. Хос эһэтэ фроҥҥа сытан суруйбут суруктарын, сэрии кэминээҕи бэргэһэлэри, бистэлиэттэри харайа, мунньа сылдьыбытын көрдөрдө, патефон тыаһатан урукку кэми санатта.
Бу кэннитэн биһиги оскуолабытыгар үөрэнэ сылдьыбыт, ыраас халлаан иһин сэрии толоонугар олоҕун толук уурбут Александр Сысолятин сырдык аатын үйэтитэр герой паартатын 4 кылаас үөрэнээччитэ Святослав Носов кэпсээтэ. Онтон 2-4 кылаас уолаттара «Дойдуну көмүскүүр боотурбут» диэн хоһооннорун хомоҕой тылларынан доргуччу ааҕан иһитиннэрдилэр. Алена Быстрова салайааччылаах, академик В.П. Ларионов аатынан «Инникигэ хардыы» научнай-практическэй кэнпириэнсийэ кыайыылаахтара бэйэлэрин чинчийбит үлэлэрин кылгастык сырдаттылар.
Ол кэнниттэн актовай саалаҕа түһэн миниистири кытта кэпсэтии буолла. Манна аһаҕас микрофон буолан оҕолор бэйэлэрэ сэргиир ыйытыыларын биэрдилэр. Нюргуна Афанасьевна олус чопчутук хоруйдаата, элбэх сүбэлэри биэрдэ. Маны таһынан бастакы сылын үлэлиир эдэр учуутал уонна номнуо 50-с сылын бу оскуолаҕа үлэлиир ытык учуутал бэйэлэрин үлэлэрин, санааларын үллэһиннилэр. Баар кыһалҕалар быһаарыллыахтара диэн Нюргуна Соколова эрэннэрдэ.
Оскуола иһинээҕи сонуннары сырдатар «АЛиК медиа-киин» оҕолоро бэйэбит ыйытыыларбытын эмиэ биэрдибит. Миниистир бэйэтин баҕа санааларын эттэ, өйүүрүн биллэрдэ. Нюргуна Соколоваҕа кэлэн ыалдьыттаабытыгар бүтүн оскуола аатыттан махтанабыт! Олус элбэҕи биллибит, иһиттибит. Маннык көрсүһүүлэр өссө да элбии турдуннар.
Айыына ДАВЫДОВА, X кылаас, Радомир АФАНАСЬЕВ, IX кылаас
Видеоҕа уһуллулар: Михайлова Дайаана, Федорова Арина
«АЛиК» медиа-киин
Л.В. Киренскэй аатынан Амматааҕы лиссиэй