Биһиги биир дойдулаахпытын, 1974-1979 сс. Танда орто оскуолатыгар саха тылын уонна литературатын учууталынан үлэлээбит, төрөөбүт сахабыт тылын аан дойдуга тарҕаппыт биллиилээх профессор, педагогика билимин дуоктара, саха тылын, литэрэтиирэтин уонна төрүт култуураны үөрэтии методикатын кафедратын профессора, РФ норуоднай үөрэхтээһинин туйгуна, РФ Үрдүк үөрэҕин бочуоттаах үлэһитэ, Саха Өрөспүүбүлүкэтин Учууталларын учууталлара, АПиСН академига Степан Константинович Колодезников аатын умнубаппыт. Ааспыт сылга муус устарга оскуолабытыгар кини аатын саха тылын уонна литературатын кабинетыгар иҥэрбиппит https://keskil14.ru/stepan-kolodeznikov-aatynan-kien-tuttabyt/
Онтон быйыл кулун тутар 3 күнүгэр оскуолабытыгар Степан Константинович Колодезников аатынан Танда үрэх сүнньүн оскуолаларын үөрэнээччилэригэр саха тылын бастакы олимпиадата ыытылынна.
Бу олимпиада сыала-соруга – Степан Константинович Колодезников аатын үйэтитии, кини дьоһун олоҕун, үлэлээбит үлэтин, үөрэнээччилэр билэллэригэр олук ууруу; үөрэнээччилэр төрөөбүт улуустарын, нэһилиэктэрин үтүө дьоннорун билэ, ытыктыы улааталларыгар интэриэһи тардыы, көҕүлээһин; төрөөбүт дойдуга ытыктабыллаах сыһыаны иҥэрии, үөрэнээччилэр айар, чинчийэр дьоҕурдарын сайыннарыы.
Бу бэлиэ тэрээһиҥҥэ Танда үрэх сүнньүн оскуолаларыттан Тит Арыыттан, Түүлээхтэн уонна Танда оскуолатытыттан уопсайа 30 үөрэнээччи кыттыыны ылла.
Олимпиада үөрүүлээх арыллыытыгар Танда оскуолатын үөрэнээччилэрэ Ийэ тыл туһунан хоһоон аахтылар. Тэрээһин бочуоттаах ыалдьыттарынан Степан Константинович аймахтара, доҕотторо буоллулар. Кинилэр бэйэлэрин санааларын үллэһиннилэр уонна бу тэрээһин салгыы сайдарыгар баҕа санааларын эттилэр. Тэрээһин биир үөрүүлээх түгэнинэн Степан Константинович Колодезников аатынан стендэ үөрүүлээх арыллыыта буолла.
Ол кэнниттэн оҕолор икки чаас устата олимпиада сорудахтарын толордулар, билиилэрин, дьоҕурдарын тургуттулар.
Олимпиада кэнниттэн оҕолор сынньанан, араас оонньуулары оонньоон сынньаннылар.
Анал байыаннай дьайыыга аналлаах ыытылла турар маскировочнай сетканы өрүү акциятыгар кыттыыны ыллылар.
Олимпиада түмүгүнэн кыайыылаахтары наҕараадалааһын буолла. Бастыҥнар дипломнарынан, бириистэринэн бэлиэтэннилэр. Степан Константинович Колодезников аатынан Танда үрэх сүнньүн оскуолаларын үөрэнээччилэригэр саха тылын бастакы олимпиадатын кыайыылаахтара кимнээхтэрий?
Алын сүһүөхтэргэ: 3 үрдэл – Никифоров Афанасий, Танда орто оскуолатын 4-с кылааһын үөрэнээччитэ; 2 үрдэл — Булдакова Саргылаана, Танда орто оскуолатын 4-с кылааһын үөрэнээччитэ;
1 үрдэл – Готовцев Гаврил, Танда орто оскуолатын 3-с кылааһын үөрэнээччитэ. Махтал сурук — Готовцева Мария Ильинична, Готовцев Гаврил салайааччыта.
Орто сүһүөхтэргэ: 3 үрдэл – Абрамова Арианна,Танда орто оскуолатын 7-с кылааһын үөрэнээччитэ;
2 үрдэл – Неустроев Дьулуур, Танда орто оскуолатын 7-с кылааһын үөрэнээччитэ; 1 үрдэл – Милана Ушницкая,Түүлээх орто оскуолатын 5-с кылааһын үөрэнээччитэ. Махтал сурук – Афанасьева Агафья Андреевна, Милана Ушницкая салайааччыта.
Улахан сүһүөхтэргэ: 3 үрдэл – Жиркова Сандаара,Түүлээх орто оскуолатын 9 кылааһын үөрэнээччитэ; 2 үрдэл – Готовцева Снежанна,Танда орто оскуолатын 9 кылааһын үөрэнээччитэ;
1 үрдэл – Уйгууна Заровняева,Түүлэх орто оскуолатын 8 кылааһын үөрэнээччитэ. Махтал сурук — Афанасьева Агафья Андреевна, Уйгууна Заровняева.
Степан Колодезников аатынан бастакы олимпиада ситиһиилээхтик ыытыллан, кыттааччыларга сырдык өйдөбүлү хаалларда. Бу тэрээһин үтүө үгэскэ кубулуйан, инникитин өссө кэҥээн, эдэр көлүөнэни саҥа ситиһиилэргэ кынаттыа диэн эрэнэбит.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан
Туйаара Мамонтова хаартыскалара, Х кылаас